اسلام آباد، رہنما پاکستان پیپلز پارٹی اور گورنر پختونخوا فیصل کریم کنڈی نے کہا کہ پی ٹی آئی کا ڈی چوک میں احتجاج کا اعلان ایک سازش ہے، تحریک انصاف کا ہمیشہ ملک کے خلاف ایجنڈا رہا ہے، یہ ملک دشمنوں کے ساتھ کام کررہے ہیں۔
اسلام آباد میں میڈیا سے گفتگو کے دوران گورنر فیصل کریم کنڈی کا کہنا تھا کہ اس ملک میں جو کچھ ہو رہا ہے سب کے سامنے ہے، پاکستان میں بہت عرصے بعد ایک اہم ترین انٹرنیشنل کانفرنس ہورہی ہے، ہم پاکستان کا ایک سافٹ امیج دنیا کو دکھانا چاہتے ہیں اور پی ٹی آئی نے کانفرنس والے دن احتجاج کی کال دی ہے۔
گورنر خیبرپختونخوا فیصل کریم کنڈی کی جانب سے سوال کرتے ہوئے یہ کہا گیا ہے کہ کیا ڈی چوک میں احتجاج کرنے سے عمران خان رہا ہوجائیں گے؟ کیا ڈی چوک میں احتجاج کرنے سے نمبر پورے ہونے پر آئینی ترامیم نہیں ہوسکے گی؟
تحریک انصاف کا ہمیشہ سے ہی ملک کے خلاف ایجنڈا رہا ہے، یہ ملک دشمنی کے ساتھ کام کررہے ہیں۔
گورنر پختونخوا کا کہنا تھا کہ اس وقت تمام پولیٹیکل جماعتیں ایس سی او کانفرنس پر اکھٹی ہیں، ہم ون پوائنٹ ایجنڈے پر کاربند ہیں، پاکستان پیپلز پارٹی نے ہمیشہ امن کی بات کی ہے، پختونخوا کا امن خراب ہوچکا ہے، ان کا یہ ایجنڈا تھا کہ ہم بھارتی وزیر کو لاکر دھرنے سے خطاب کروائیں گے، سب سے پہلے ملک سیاست بعد میں۔
فیصل کریم کنڈی کا کہنا تھا کہ پیپلز پارٹی نے ملک کیلئے بہت قربانیاں دی، ہم سے زیادہ ورکرز کی قربانی کسی دوسری پارٹی نے نہیں دی، سیاسی شخصیات کا سب سے بہترین فورم پارلیمنٹ ہے۔
رہنما پیپلزپارٹی کا کہنا تھا کہ یہ لوگ دوسروں کے بچوں کو مروانے کے چکر میں ہیں، خود بھی سڑکوں پر نکلیں اور احتجاج کریں، یہ وہ لوگ ہیں جو ملکی ترقی کرتے ہوئے نہیں دیکھ سکتے۔
