پاکستان تحریک انصاف (پی ٹی آئی) نے پارلیمانی قومی سلامتی کمیٹی کے اجلاس میں شرکت کرنے کا فیصلہ کر لیا ہے۔
ذرائع کے مطابق، چیئرمین پی ٹی آئی بیرسٹر گوہر سمیت متعدد رہنماؤں نے اجلاس میں شرکت کے حق میں دلائل دیے، جبکہ جنید اکبر نے بانی پی ٹی آئی سے مشاورت کی تجویز دی۔
ذرائع کا کہنا ہے کہ پی ٹی آئی نے اجلاس میں شرکت کے لیے 14 نام اسپیکر قومی اسمبلی ایاز صادق کو بھجوا دیے ہیں۔
پی ٹی آئی کی جانب سے بیرسٹر گوہر، اسد قیصر، زرتاج گل، صاحبزادہ حامد رضا، عامر ڈوگر، ثنا اللہ مستی خیل، علی محمد خان، سینیٹر علی ظفر، سینیٹر ہمایوں محمد اور سینیٹر عون عباس بپی سمیت دیگر رہنماؤں کے نام دیے گئے ہیں۔
واضح رہے کہ وزیر اعظم شہباز شریف نے قومی سلامتی کی پارلیمانی کمیٹی کا ان کیمرا اجلاس کل طلب کر رکھا ہے، جس میں عسکری قیادت ملک کی موجودہ سیکیورٹی صورتحال پر بریفنگ دے گی۔
یہ اجلاس قومی اسمبلی ہال میں منعقد ہوگا، جس میں تمام پارلیمانی جماعتوں کے لیڈرز اور ان کے نامزد نمائندے شریک ہوں گے، جبکہ متعلقہ اراکین کابینہ بھی اس اجلاس میں موجود ہوں گے۔
دوسری جانب وزیر اطلاعات پنجاب عظمیٰ بخاری نے کہا ہے کہ پاک فوج کے جوان اپنی جانیں قربان کر کے ملک کا دفاع کر رہے ہیں، جبکہ ایک مخصوص سیاسی جماعت دہشت گرد حملوں پر خوشی منا رہی ہے، جو کسی صورت قابلِ قبول نہیں۔
