72
انسداد دہشت گردی عدالت اسلام آباد کی جانب سے 26 نومبر کے احتجاج پر درج مقدمات میں پاکستان تحریک انصاف ( پی ٹی آئی) کے 5 کارکنوں کی بعد از گرفتاری درخواست ضمانت منظور کرلی گئی۔
انسداد دہشتگری عدالت نمبر 1 کے جج ابوالحسنات محمد ذوالقرنین کی جانب سے پی ٹی آئی کارکنوں کی بعد از گرفتاری ضمانت کی درخواستوں پر سماعت کی گئی۔
درخواست گزاروں کے وکلا کی جانب سے موقف اختیار کیاگیا کہ اسی مقدمے میں بیشتر ملزمان کی ضمانتیں منظور ہو چکی ہیں۔ ملزمان سے کوئی برآمدگی بھی نہیں ہوئی، استدعا ہے کہ عدالت ملزمان کی ضمانت کی درخواستوں کو منظور کرے۔
عدالت کی جانب سے دلائل مکمل ہونے کے بعد ضمانتوں پر فیصلہ سنایا گیا۔
عدالت کی جانب سے ملزمان کی ضمانتیں 5 ہزار روپے کے مچلکوں کے عوض منظور کی گئیں، ملزمان کی جانب سے سردار محمد مصروف خان ایڈووکیٹ اور آمنہ علی ایڈووکیٹ نے دلائل دیئے۔
ملزمان کے خلاف توڑ پھوڑ اور جلاو گھیراؤ کی دفعات کے تحت تھانہ کوہسار میں مقدمات درج ہیں۔
