متحدہ عرب امارات میں نئے ٹریفک قانون کے تحت پیدل سڑک کراس کرنے والوں پر بھی جرمانہ ہوگا۔
متحدہ عرب امارات نے نئے ٹریفک قوانین متعارف کرائے ہیں جن کے تحت سڑک استعمال کرنے والے تمام افراد، بشمول پیدل چلنے والوں، کے لیے سخت قواعد نافذ کیے جائیں گے۔ یہ قوانین 29 مارچ 2025 سے نافذ ہوں گے، اور خلاف ورزی کی صورت میں بھاری جرمانے اور سزائیں مقرر کی گئی ہیں۔
نئے قوانین کے تحت ٹریفک کی آٹھ سنگین خلاف ورزیوں پر 2 لاکھ درہم تک کا جرمانہ عائد کیا جا سکتا ہے۔ ان خلاف ورزیوں میں نشے کی حالت میں گاڑی چلانا، معطل لائسنس کے باوجود گاڑی چلانا، حادثے کے مقام سے فرار، حادثے میں کسی کی موت کا سبب بننا، مختص مقامات کے علاوہ سڑک پار کرنا، اور سیلاب کے دوران وادی میں گاڑی چلانا شامل ہیں۔
نئے قانون میں ڈرائیونگ کی کم از کم عمر کو 18 سال سے کم کر کے 17 سال کر دیا گیا ہے۔ اس کے علاوہ، 80 کلومیٹر فی گھنٹہ سے زیادہ رفتار والی شاہراہوں پر پیدل سڑک پار کرنے کو بھی خلاف ورزی تصور کیا گیا ہے، جس پر پیدل چلنے والوں کو 5 سے 10 ہزار درہم جرمانے اور تین ماہ قید کی سزا کا سامنا کرنا پڑ سکتا ہے۔
الکوحل یا کسی اور نشے کے زیر اثر گاڑی چلانے پر کم از کم 30 ہزار سے 2 لاکھ درہم تک کا جرمانہ اور قید یا دونوں سزائیں دی جا سکتی ہیں۔ ہٹ اینڈ رن کیس میں حکام سے عدم تعاون یا معلومات چھپانے پر ایک سال قید اور 50 ہزار سے 1 لاکھ درہم تک کا جرمانہ ہوگا۔
