لاہور، پنجاب حکومت کی جانب سے صوبے میں پلاسٹک مصنوعات بنانے، سپلائی کرنے، اور ری سائیکل کرنے والوں کی آن لائن رجسٹریشن کا فیصلہ کیا گیا ہے۔
اس حوالے سے ایک بیان میں سینئر وزیر پنجاب مریم اورنگزیب کا کہنا ہے کہ صوبے میں پلاسٹک پروڈیوسرز، سپلائرز اور ری سائیکلرزکی رجسٹریشن آن لائن کرنےکا فیصلہ کیا ہے جس سے پلاسٹک انڈسٹری کا ڈیٹا ایک جگہ اکٹھاکیا جائےگا۔
وزیر تحفظ ماحولیات کے مطابق پلاسٹک کی سپلائی سائیڈ کو مکمل طور پر رسمی معیشت کا حصہ بنانامقصود ہے، اس اقدام سے ماحولیاتی آلودگی پر قابو پایا جائیگا اور معیشت میں شفافیت بھی بڑھےگی۔
صوبائی وزیر کا کہنا تھا کہ 75 مائیکرون سے کم حجم والے پولیتھین بیگز کے خلاف ایکشن لیا جارہا ہے، پلاسٹک تھیلے بنانے والی 9 فیکٹریوں کو خلاف ورزی پر نوٹس جاری کر دیے جب کہ اینٹی پلاسٹک اسکواڈز فوڈ پوائنٹس، مارکیٹوں اور دکانوں کا معائنہ کر رہے ہیں۔
مریم اورنگزیب کا کہنا تھا کہ پلاسٹک بیگز کا استعمال ختم کرنے کیلئے سخت اقدامات کررہے ہیں، دکانداروں کو متبادل ماحول دوست بیگز استعمال کرنے کی ہدایت کی ہے۔
سینئر ن لیگی رہنما کا کہنا تھا کہ پلاسٹک تھیلوں پر پابندی یقینی بنانےکے لیے کارروائیاں جاری رکھی جائیں گی اور محکمہ تحفظ ماحول 10 دسمبرسےاینٹی پلاسٹک مہم اور کریک ڈاؤن تیزکرےگا۔
