الیکشن ٹربیونل میں این اے 64 اور پی پی 32 کے نتائج کالعدم دینے کی سماعت، انتخابی عذرداریوں کے قابل سماعت ہونے پر دلائل طلب، آئندہ سماعت 13 جنوری کو ہوگی۔
لاہور ہائیکورٹ میں قائم الیکشن ٹربیونل میں قومی اسمبلی کے حلقہ این اے 64 اور پنجاب اسمبلی کے حلقہ پی پی 32 گجرات کے نتائج کے خلاف انتخابی عذرداری پر سماعت ہوئی۔
الیکشن ٹربیونل نے انتخابی عذرداریوں کے قابل سماعت ہونے پر دلائل طلب کرلیے ہیں، آئندہ سماعت 13 جنوری کو ہوگی۔
چوہدری پرویز الہٰی اور اُن کی اہلیہ قیصرہ الہٰی کی طرف سے عامر سعید راں ایڈووکیٹ ٹربیونل کے روبرو پیش ہوئے۔
درخواست میں موقف اختیار کیا گیا کہ این اے 64 گجرات سے قیصرہ الہٰی نے 1 لاکھ 72 ہزار ووٹ حاصل کیے جبکہ کامیاب قرار دیے گئے سالک حسین نے 33 ہزار ووٹ حاصل کیے۔
درخواست میں مزید کہا گیا کہ الیکشن کمیشن نے ووٹوں کے فرق کے باوجود فارم 47 میں سالک حسین کو این اے 64 سے کامیاب قرار دے دیا۔
سابق وزیراعلیٰ پنجاب کی درخواست میں موقف اختیار کیا گیا کہ پی پی 32 گجرات سے پرویز الہٰی نے 73 ہزار ووٹ حاصل کیے جبکہ فارم 45 کے مطابق سالک حسین نے 10 ہزار ووٹ حاصل کیے لیکن الیکشن کمیشن نے فارم 47 میں سالک حسین کو کامیاب قرار دیا۔
پرویز الہٰی اور قیصرہ الہٰی نے الیکشن ٹربیونل سے این اے 64 اور پی پی 32 کا جاری کردہ کامیابی کا نوٹیفکیشن کالعدم قرار دینے کی استدعا کی ہے۔
