پاکستان ہاکی ٹیم کے کھلاڑی ابو بکر کا لاہور میں کامیاب گھٹنے کی سرجری ہوگئی۔
پاکستان ہاکی ٹیم کے کھلاڑی ابو بکر کا لاہور میں کامیاب گھٹنے کی سرجری ہوگئی۔ ابو بکر ایشین ہاکی چیمپئنز ٹرافی میں بھارت کے خلاف میچ کے دوران گھٹنے کی انجری کا شکار ہوئے تھے۔ ان کی سرجری اسکاٹ لینڈ سے آئے ہوئے پاکستانی ڈاکٹر کامران بٹ نے مقامی اسپتال میں کی۔
پاکستان ہاکی فیڈریشن (پی ایچ ایف) کے صدر طارق بگٹی، سابق صدر اختر رسول، اور کوچ طاہر زمان نے اسپتال میں ابو بکر کی عیادت کی۔ ابو بکر نے کامیاب آپریشن پر خوشی کا اظہار کرتے ہوئے پی ایچ ایف کا شکریہ ادا کیا اور بتایا کہ ری ہیب کے لیے آسٹریلیا جانے کا منصوبہ ہے۔ انہوں نے کہا کہ مکمل فٹ ہونے میں تقریباً پانچ سے چھ ماہ کا وقت لگ سکتا ہے۔
صدر پی ایچ ایف طارق بگٹی نے کہا کہ انہوں نے ہمیشہ کھلاڑیوں کا خیال رکھا ہے اور ابو بکر کے چہرے پر مسکراہٹ دیکھ کر خوشی محسوس ہوئی۔ انہوں نے کہا کہ ابو بکر پاکستان کا فخر ہیں اور ہم انہیں جلد دوبارہ میدان میں دیکھنا چاہتے ہیں۔
ڈاکٹر کامران بٹ نے سرجری کی کامیابی کی تصدیق کرتے ہوئے بتایا کہ ابو بکر کو آج ہی اسپتال سے ڈسچارج کیا جارہا ہے۔ انہوں نے کہا کہ اگر ابو بکر ری ہیب پر فوکس کریں تو وہ جلد صحت یاب ہوسکتے ہیں۔
