اسلام آباد، وزیر خارجہ اسحاق ڈار نے کہا ہے کہ پاکستان کے خدشات دور کرنے کے لیے افغانستان کے ساتھ مذاکرات کیے جائیں گے۔
وزارت خارجہ کے ترجمان کے مطابق، اسحاق ڈار کی زیر صدارت پاک-افغان تعلقات پر ایک اہم اجلاس منعقد ہوا، جس میں انہوں نے افغانستان کے ساتھ سفارتی روابط پر تبادلہ خیال کیا۔
اجلاس کے دوران افغانستان کے لیے خصوصی نمائندے صادق خان نے اپنے حالیہ دورہ کابل کے بارے میں بریفنگ دی اور افغان حکام کے ساتھ ہونے والی ملاقاتوں سے متعلق تفصیلات فراہم کیں۔
وزیر خارجہ نے اجلاس کے شرکاء سے خطاب کرتے ہوئے پاکستان کے خدشات دور کرنے کے لیے افغانستان کے ساتھ تعمیری مذاکرات کی ضرورت پر زور دیا، جبکہ دو طرفہ تعلقات کو مزید مضبوط بنانے کی اہمیت بھی اجاگر کی۔
ترجمان کے مطابق، اجلاس میں سیکرٹری خارجہ سمیت وزارت خارجہ کے دیگر اعلیٰ حکام نے بھی شرکت کی۔
دوسری جانب وزیر اعلیٰ پنجاب مریم نواز شریف نے جناح اسپتال کا اچانک دورہ کیا، جہاں شہریوں کی جانب سے شکایات موصول ہونے پر اسپتال کے ایم ایس اور پرنسپل کو معطل کرنے کے احکامات جاری کر دیے۔
نجی ٹی وی دنیا نیوز کے مطابق وزیر اعلیٰ کے دورے کے دوران شہریوں نے مسائل پر احتجاج کیا، جس پر مریم نواز نے اسپتال کے میڈیسن اسٹور کا جائزہ لیا۔ ادویات دستیاب ہونے کے باوجود مریضوں کو نہ دیے جانے پر انہوں نے برہمی کا اظہار کیا۔
