پاکستان نے ایک شاندار کارکردگی کا مظاہرہ کرتے ہوئے ڈیوس کپ جونیئرز 2025 جیت کر تاریخ رقم کر دی۔
ٹیم پاکستان نے ایونٹ کے فائنل میں انڈونیشیا کے خلاف 2-1 سے سنسنی خیز کامیابی حاصل کر کے ٹائٹل اپنے نام کیا۔
اس تاریخی کامیابی کے ساتھ، پاکستانی ٹیم پورے ٹورنامنٹ میں ناقابل شکست رہی اور کھلاڑیوں نے غیر معمولی مہارت، عزم اور زبردست ٹیم ورک کا مظاہرہ کیا۔
اس جیت کے نتیجے میں، پاکستان نے ITF ایشیا/اوشیانا ڈیوس کپ جونیئرز کوالیفائنگ ایونٹ کے لیے کوالیفائی کر لیا ہے، جو 19 سے 24 مئی 2025 تک قازقستان میں منعقد ہوگا۔ اس ٹورنامنٹ میں ایشیا اور اوشیانا کی 16 بہترین ٹیمیں عالمی گروپ میں جگہ حاصل کرنے کے لیے مدِ مقابل ہوں گی۔
پاکستان ٹینس فیڈریشن (PTF) کے صدر اعصام الحق نے ٹیم کی اس غیر معمولی کامیابی پر مبارکباد دیتے ہوئے اسے پاکستان کے لیے فخر کا لمحہ قرار دیا۔
انہوں نے کھلاڑیوں میکائیل علی بیگ، ابوبکر طلحہ اور حمزہ رومان کے ساتھ کپتان شہزاد خان کو ان کی انتھک محنت اور عزم پر سراہتے ہوئے اس بات پر زور دیا کہ پاکستان عالمی ٹینس کے میدان میں نمایاں پیش قدمی کر رہا ہے۔
اعصام الحق کا کہنا تھا کہ پاکستانی ٹیم 2023 میں 16 میں سے 16 ویں، 2024 میں 16 میں سے 5 ویں نمبر پر تھی، جبکہ اس سال چیمپئن شپ جیت کر ایک تاریخی سنگ میل عبور کیا، جو اس بات کا واضح ثبوت ہے کہ پاکستان کی ٹینس ترقی کی راہ پر گامزن ہے۔
