جدہ، وزیر خارجہ اسحاق ڈار کا کہنا ہے کہ پاکستان فلسطینی عوام کے ساتھ کھڑا ہے اور عرب لیگ کے فیصلوں کی مکمل حمایت کرتا ہے۔
اسلامی تعاون تنظیم (او آئی سی) کے وزرائے خارجہ کا غیر معمولی اجلاس سعودی عرب کے شہر جدہ میں او آئی سی کے ہیڈ کوارٹر میں منعقد ہوا، جس میں تنظیم کے رکن ممالک نے شرکت کی،پاکستان کی نمائندگی وزیر خارجہ اسحاق ڈار نے کی۔
اجلاس میں فلسطینی عوام کے خلاف جاری اسرائیلی جارحیت، جبری نقل مکانی اور فلسطینی زمین کے الحاق کے منصوبوں پر گفتگو کی گئی،وزرائے خارجہ نے متفقہ طور پر عرب منصوبے کے تحت غزہ کی تعمیر نو کی حمایت کی اور فلسطینی عوام کو جبراً غزہ سے بےدخل کرنے کے کسی بھی بیان کو مسترد کر دیا۔
وزیر خارجہ اسحاق ڈار نے اجلاس سے خطاب کرتے ہوئے کہا کہ پاکستان ہمیشہ فلسطینی عوام کے ساتھ کھڑا رہا ہے اور ان کے جائز حقوق کے لیے آواز بلند کرتا رہے گا، انہوں نے زور دیا کہ غزہ کی تعمیر نو کے ساتھ ساتھ اسرائیل کو فلسطینیوں پر جاری ظلم و ستم فوری طور پر بند کرنا چاہیے اور عالمی قوانین کی پاسداری کرنی چاہیے۔
او آئی سی کے اس اجلاس میں رکن ممالک نے فلسطینی عوام کے ساتھ اظہار یکجہتی کرتے ہوئے اسرائیلی جارحیت کی مذمت کی اور عالمی برادری سے مطالبہ کیا کہ وہ فلسطینی عوام کے حقوق کے تحفظ کے لیے فوری اور عملی اقدامات کرے۔
