اسلام آباد، وفاقی وزیر اطلاعات و نشریات عطا تارڑ کا کہنا ہے کہ پاکستان اور ترکیہ کے درمیان مختلف شعبوں میں تعاون بڑھانے کی ضرورت ہے۔
اسلام آباد میں پاک ترکیہ فرینڈ شپ ریڈیو میوزیم کی افتتاحی تقریب سے خطاب کے دوران وزیر اطلاعات و نشریات عطا تارڑ نے کہا کہ اس میوزیم کے ذریعے ریڈیو پاکستان کے کردار اور تاریخی پس منظر کو آئندہ وقت کیلئے محفوظ کیا، جو قومیں ماضی پر فخر نہیں کرتیں وہ کبھی ترقی نہیں کرتیں۔
برصغیر کے مسلمانوں کو پتا لگا کہ ترکی کے مسلمانوں کو ہماری مدد کی اشد ضرورت ہے، برصغیر کے لوگوں نے مشکل وقت میں ترکیہ کے عوام کی مدد کی، پاکستان اور ترکیہ کی دوستی کی طویل تاریخ ہے، پاکستانی عوام ترکیہ کو اپنا دوسرا گھر سمجھتے ہیں، پاک ترکیہ فرینڈ شپ ریڈیو میوزیم کا قیام اہمیت کا حامل ہے۔
عطا تارڑ نے کہا کہ ریڈیو پاکستان کی نمائندگی پر فخر ہے، قائداعظم کی ریڈیو پر ریکارڈ تقاریر بھی ہم نے سنیں، بہت سے لوگوں نے ریڈیو پاکستان سے کیریئر کا آغاز کیا، آج ہماری اکانومی زراعت پر منحصر ہے، زراعت سے متعلق ریڈیو پر معلومات دی جاتی تھیں، معیشت کی بہتری میں بھی ریڈیو کا کردار اہم رہا ہے۔
وفاقی وزیر اطلاعات نے کہا کہ دنیا میں اتنی خیرات کوئی اور قوم نہیں کرتی جتنی پاکستانی کرتے ہیں، آزاد کشمیر میں زلزلہ آیا تو پورے پاکستان سے لوگ امدادی سامان لیکر پہنچے، عوام کو ریڈیو پاکستان کے کردار سے اجاگر کرنا ہے۔
