پاکستان اور بنگلا دیش کے تعلقات میں نیا موڑ، 15 سال بعد پاکستان اور بنگلادیش کے درمیان دو طرفہ فارن آفس مشاورت بحال۔
آج ڈھاکہ میں پاکستان اور بنگلادیش کی دفتر خارجہ کا مشاورتی اجلاس ہوگا جس میں دونوں ممالک کے خارجہ سیکرٹری وفود کی قیادت کریں گے۔
میڈیا رپورٹس کے مطابق پاکستان کی جانب سے اجلاس میں شرکت کرنے کیلئے پاکستان کی خارجہ سیکرٹری آمنہ بلوچ گزشتہ روز ڈھاکا پہنچی تھیں، جہاں بنگلادیش کی ڈائریکٹر جنرل برائے جنوبی ایشیا عشرت جہاں نے ان کا خیرمقدم کیا۔
اجلاس میں باہمی دلچسپی کے امور، علاقائی صورتحال اور دو طرفہ تعاون کے فروغ پر گفتگو متوقع ہے۔
واضح رہے کہ بنگلادیش اور پاکستان کے درمیان 2012 میں آخری دفعہ سیاسی مشاورت ہوئی تھی جس کے بعد دونوں ممالک کے تعلقات میں دوریاں پیدا ہوگئیں تھیں، تاہم حسینہ واجد کے بنگلادیش میں اقتدار کے خاتمے کے بعد اب یہ اہم پیش رفت دونوں ملکوں کے درمیان تعلقات کو بہتر بنانے کی سمت ایک اہم قدم تصور کی جا رہی ہے۔
جبکہ سیاسی مشاورتی اجلاس کے بعد پاکستان کے نائب وزیراعظم اسحاق ڈار کے بنگلادیش کے دورے کی خبریں زیر گردش ہیں جس کے مطابق اسحاق ڈار 22 سے 24 اپریل تک بنگلا دیش کا دورہ کریں گے۔
اس دورے میں دونوں ممالک کے مابین مزید اقتصادی اور سیاسی تعلقات کو فروغ دینے کے لیے بات چیت کی جائے گی۔
پاکستان اور بنگلا دیش کے درمیان اس اجلاس اور دورے کی متوقع پیش رفت سے دونوں ممالک کے تعلقات میں مزید بہتری کی امید ہے۔
