مذہبی تہوار کی پیش نظر ننکانہ صاحب میں تعلیمی ادارے پانچ دن کیلئے بند رکھنے کا اعلان کردیا گیا۔
پنجاب کے شہر ننکانہ صاحب میں بیساکھی تہوار کی تقریبات کے پیش نظر ضلع بھر کے تعلیمی ادارے 12 اپریل سے 16 اپریل تک بند رکھنے کا اعلان کر دیا گیا ہے۔
ضلعی انتظامیہ کے جاری کردہ نوٹیفکیشن کے مطابق، تعطیلات کا فیصلہ بھارت سے آنے والے سکھ یاتریوں کی آمد اور بیساکھی کے مرکزی پروگرام کے باعث کیا گیا ہے۔ واضح رہے کہ بیساکھی کا مرکزی پروگرام 14 اپریل کو منعقد ہوگا۔
اس موقع پر سیکیورٹی کے فول پروف انتظامات کیے گئے ہیں۔ ڈسٹرکٹ پولیس آفیسر (ڈی پی او) کی ہدایات پر سیکیورٹی پلان جاری کر دیا گیا ہے جس کے تحت تقریب کی حفاظت کے لیے 2 ہزار سے زائد پولیس افسران اور اہلکار تعینات ہوں گے۔
پاک بھارت مذہبی سیاحتی معاہدے کے تحت 3000 سکھ یاتریوں کو پاکستان آنے کی اجازت ہے، تاہم رواں سال 7000 سے زائد بھارتی یاتری پاکستان آنے کے خواہش مند ہیں۔ اس سلسلے میں نئی دہلی میں پاکستانی ہائی کمیشن سے اضافی ویزوں کے اجرا کی درخواست کی گئی ہے۔
بیساکھی کی تقریبات کے دوران سکھ یاتری ننکانہ صاحب سمیت دیگر مقدس مقامات پر حاضری دیں گے۔ انتظامیہ کی جانب سے تمام تر انتظامات مکمل کر لیے گئے ہیں۔
