کوئٹہ،وفاقی وزیر ریلوے حنیف عباسی نے اعلان کیا ہے کہ کوئٹہ میں معطل ٹرین سروس کل سے دوبارہ شروع کی جائے گی۔
پریس کانفرنس کے دوران وزیر ریلوے نے بتایا کہ جعفر ایکسپریس کل پشاور سے کوئٹہ روانہ ہوگی اور پرسوں کوئٹہ سے اپنا سفر شروع کرے گی، جبکہ بولان میل ہفتے کے ساتوں دن چلے گی۔
عید اسپیشل ٹرین 29 مارچ کو کوئٹہ سے روانہ ہوگی، اور عید کے پہلے تین دنوں کے لیے 20 فیصد رعایت دی جائے گی۔
انہوں نے کہا کہ جعفر ایکسپریس پر ہونے والا حملہ عالمی سطح پر سنگین دہشت گردی کے واقعات میں شمار کیا جا سکتا ہے، جس میں قیمتی انسانی جانوں کا ضیاع ہوا۔ دہشت گردوں نے عام شہریوں کو نشانہ بنایا، اور حملہ لسانی، قومی اور فرقہ وارانہ بنیادوں پر کیا گیا، اس واقعے کی عالمی سطح پر مذمت کی گئی ہے۔
وزیر ریلوے نے کہا کہ ملک میں دہشت گردی دراصل پاکستان کو غیر مستحکم کرنے کی ایک سازش ہے۔ بعض اندرونی عناصر دہشت گردوں کو مدد فراہم کرتے ہیں، جس کے باعث وہ اپنے ناپاک عزائم میں کامیاب ہو جاتے ہیں، چونکہ پاکستان ایک ایٹمی طاقت ہے، اس لیے اسے غیر مستحکم کرنے کی کوششیں کی جا رہی ہیں۔
انہوں نے سکیورٹی فورسز کو خراج تحسین پیش کرتے ہوئے کہا کہ جعفر ایکسپریس پر حملے کے بعد فورسز نے زبردست ردعمل دیا،ضرار کمپنی کے کمانڈوز نے اپنی جانوں کو خطرے میں ڈال کر کئی مسافروں کی زندگیاں بچائیں۔
وزیر ریلوے نے کہا کہ ایک انسان کا قتل پوری انسانیت کا قتل ہےاور حکومت اور سکیورٹی اداروں نے فیصلہ کیا ہے کہ دہشت گرد جہاں بھی ہوں گے ان کے خلاف سخت کارروائی کی جائے گی، اس واقعے میں ملوث کئی دہشت گردوں کو سکیورٹی فورسز نے انجام تک پہنچا دیا ہے۔
قبل ازیں، وزیر ریلوے نے چیئرمین مظہر علی شاہ اور سی ای او ریلوے امیر بلوچ کے ہمراہ کوئٹہ ریلوے اسٹیشن کا دورہ کیا اور جعفر ایکسپریس کی متاثرہ بوگیوں کا معائنہ کیا۔
