لاہور، وزیراعلیٰ پنجاب مریم نواز شریف کی جانب سے پنجاب میں 5 سالہ ٹرانسپورٹ پروگرام کی منظوری دے دی گئی۔
وزیراعلیٰ مریم نواز شریف کی زیر صدارت ٹرانسپورٹ کے حوالے سے خصوصی ویڈیو لنک اجلاس ہوا، اجلاس میں پنجاب میں جدید ترین آٹو میٹڈ ریپڈ ٹرانسپورٹ سسٹم متعارف کرانے کا فیصلہ کیا گیا۔
اجلاس میں وزیراعلیٰ پنجاب کو بریفنگ کے دوران بتایا گیا کہ آٹو میٹڈ ریپڈ ٹرانسپورٹ سسٹم ملیشیاء، ابوظہبی اور قطر سمیت دنیا بھر میں ماس ٹرانزٹ کا کامیاب سسٹم ہے، عام بس کی نسبت اے آر ٹی کے لئے روڈ پر کم جگہ درکار ہوگی جس پر وزیراعلیٰ مریم نواز نے اے آر ٹی کے فوری ٹرائل رن کرنے کا حکم دے دیا۔
بریفنگ کے مطابق اے آر ٹی تین کوچز پر مشتمل بس میں 300 سے زائد مسافروں کی گنجائش ہوگی، اے آر ٹی سمارٹ سٹیشن پر بس کھڑے کھڑے چند منٹ میں چارج ہوجائے گی، اے آر ٹی میں مسافروں کے لئے فارسٹ چارجنگ، وائی فائی، مانیٹرنگ کیمرہ اور دیگر سہولیات میسر ہونگی۔
اے آر ٹی روایتی فیول کی بجائے مکمل سولرائزڈ سسٹم ہوگا، پہلے مرحلے میں لاہور، فیصل آباد اور گوجرانوالہ سمیت دیگر شہروں میں اے آر ٹی ٹرانسپورٹ سسٹم متعارف کرایا جائے گا، تین مراحل میں 10،10 شہروں میں نیا ٹرانسپورٹ سسٹم متعارف کرایا جائے گا۔
مریم نواز کا کہنا ہے کہ آٹو میٹڈ ریپڈ ٹرانسپورٹ پنجاب بھر میں 4سال میں مکمل کرنا چاہتے ہیں، جدت کا ٹیچ دینے کے لئے ہر شہر میں نیا ٹرانسپورٹ سسٹم ضروری ہے۔
