اسلام آباد، وزیراعظم شہباز شریف کا کہنا ہے کہ وزیراعظم یوتھ پروگرام نوجوانوں کی ترقی و بہبود کا فلیگ شپ پروگرام ہے۔
اسلام آباد میں دولت مشترکہ ایشیاء یوتھ الائنس کی تقریب سے خطاب کے دوران وزیراعظم شہباز شریف نے کہا کہ دولت مشترکہ یوتھ الائنس سمٹ کی میزبانی پر خوشی ہے، حکومت اور عوام کی جانب سے شرکاء کو خوش آمدید کہتا ہوں، پاکستان دولت مشترکہ کا بانی رکن ہے۔
وزیراعظم نے کہا کہ چیلنجز سے نمٹنے میں دولت مشترکہ رکن ممالک کے درمیان بہترین شراکت داری کا پلیٹ فارم ہے، دولت مشترکہ کے رکن ممالک کی 60 فیصد آبادی 30 سال سے کم عمر ہے، دولت مشترکہ ممالک کا مستقبل نوجوانوں پر منحصر ہے۔
شہباز شریف نے کہا کہ ہمیں نوجوانوں کی صلاحیتوں کو نکھارنا ہے، نوجوانوں کو جدید ٹیکنالوجی اور فنی تعلیم سے آراستہ کرنا ہے۔
نوجوان پرامن اور خوشحال مستقبل کی ضمانت ہیں، نوجوانوں کی بہبود اور ترقی کے حوالے سے پنجاب اور وفاق نے متعدد منصوبے شروع کیے ہیں۔
وزیراعظم پاکستان نے کہا کہ پنجاب ایجوکیشن انڈوومنٹ فنڈ کے ذریعے کمزور مالی وسائل کے ہونہار طلبا کو وظائف دیئے گئے، اسلام آباد، گلگت بلتستان، آزاد کشمیر اور بلوچستان کے دور دراز علاقوں میں دانش سکول قائم کررہے ہیں۔
شہباز شریف ان کا کہنا تھا کہ ’’وزیراعظم یوتھ پروگرام ‘‘ نوجوانوں کی ترقی و بہبود کا فلیگ شپ پروگرام ہے، میں نے اپنی تمام سیاسی زندگی میں نوجوانوں کو بااختیار بنانے کے حوالے سے اقدامات اٹھائے۔
اس سے قبل وزیراعظم شہباز شریف قومی یوتھ کونسل کے ارکان سے حلف لیا اور نوجوانوں میں ایوارڈز بھی تقسیم کیے۔
