اسلام آباد، وزیراعظم شہباز شریف کی جانب سے پرائم منسٹر یوتھ پروگرام کے تحت قرض کی رقم بڑھانے کی ہدایت کردی گئی۔
وزیراعظم شہباز شریف کی زیر صدارت چھوٹے اور درمیانے درجے کے کاروبار کے امور پر جائزہ اجلاس ہوا، جس میں متعلقہ حکام نے شہباز شریف کو بریفنگ دی۔
وزیراعظم پاکستان نے حکام کو ہدایت کی کہ چھوٹے اور درمیانے درجے کے کاروبار کو سہولیات دینے کیلئے تفصیلی سروے جلد مکمل کیا جائے اور پرائم منسٹر یوتھ پروگرام کے تحت قرض کی رقم 5 لاکھ سے بڑھا کر 15 لاکھ کی جائے۔
وزیراعظم کا کہنا ہے کہ سہولیات کو بین الاقوامی تقاضوں سے ہم آہنگ کرنے کے لیے ترقی یافتہ ممالک کے ماڈلز کا اطلاق یقینی بنایا جائے، چھوٹے پیمانے کے کاروبار میں خواتین انٹرپرینیورز کے لیے خصوصی پیکج تشکیل دے کر اسے جلد پیش کیا جائے۔
وزیراعظم کا کہنا تھا کہ دنیا بھر میں ایس ایم ایز معیشت کی ترقی میں کلیدی اہمیت رکھتی ہیں، حکومت نوجوانوں اور خواتین انٹرپرینیورز کو با اختیار بنانے کے لیے کوشاں ہے، نوجوان اور خواتین نہ صرف خود روزگار کمائیں بلکہ روزگار کے مزید مواقع بھی پیدا کریں۔
دوسری جانب سپریم کورٹ کے باہر میڈیا سے گفتگو کے دوران عوامی مسلم لیگ کے سربراہ شیخ رشید کا کہنا تھا کہ اس وقت ملک میں بحران ہے، مجھے نتیجہ پاکستان اور عوام کی بہتری میں نکلتا دکھائی نہیں دے رہا، دعا ہے نتیجہ پاکستان اور عوام کی بہتری میں نکلے۔
