سعودی عرب کے دورے کے دوران وزیراعظم شہباز شریف اور سعودی ولی عہد شہزادہ محمد بن سلمان کے مابین ہونیوالی ملاقات میں دوطرفہ اقتصادی اور تجارتی تعاون بڑھانے پر اتفاق کیا گیا۔
اسلام آباد: وزیر اعظم پاکستان محمد شہباز شریف اور سعودی ولی عہد محمد بن سلمان کے درمیان ریاض میں فیوچر انویسٹمنٹ انیشیٹو (FII) فورم کے موقع پر اہم ملاقات ہوئی جس میں دو طرفہ تعلقات، اقتصادی شراکت داری اور خطے کے اہم معاملات پر تبادلہ خیال کیا گیا۔
سرکاری اعلامیے کے مطابق، وزیراعظم شہباز شریف نے سعودی ولی عہد اور وزیر اعظم محمد بن سلمان سے ملاقات کے دوران خادم حرمین شریفین شاہ سلمان بن عبدالعزیز کی صحت و سلامتی کے لیے نیک خواہشات کا اظہار کیا اور عالمی مالیاتی اداروں کے معاملات میں پاکستان کی حمایت پر ان کا شکریہ ادا کیا۔ وزیراعظم نے محمد بن سلمان اور سعودی حکومت کی جانب سے پرتپاک مہمان نوازی پر بھی شکریہ ادا کیا اور فیوچر انویسٹمنٹ انیشیٹو فورم کے کامیاب انعقاد پر ولی عہد کی دور اندیش قیادت کی تعریف کی۔
ملاقات کے دوران، دونوں رہنماؤں نے پاکستان اور سعودی عرب کے درمیان اقتصادی شراکت داری کو مزید مضبوط کرنے کا عزم کیا۔ انہوں نے تجارت، سرمایہ کاری، اور اقتصادی تعاون کے شعبوں میں جاری دو طرفہ تعلقات کو وسعت دینے پر اتفاق کیا۔ وزیر اعظم شہباز شریف نے حالیہ دورے کے دوران سعودی وزیر سرمایہ کاری کی قیادت میں اعلیٰ سطحی وفد کے دورے کا ذکر کیا اور اس دوران دستخط شدہ ایم او یوز کی بنیاد پر پاک سعودی معاشی تعلقات کو مزید مستحکم کرنے کی اہمیت پر زور دیا۔
دونوں رہنماؤں نے خطے میں جاری اسرائیلی جارحیت پر بھی تشویش کا اظہار کیا، جس کے نتیجے میں ہونے والی بے پناہ تباہی اور انسانی بحران پر گفتگو کی۔ اعلامیے کے مطابق، دونوں ممالک کے درمیان موجود مشترکہ مذہبی اور ثقافتی تعلقات کو مزید مضبوط بنانے پر زور دیا گیا جو کہ دہائیوں سے قائم ہیں اور وقت کے ساتھ ساتھ بڑھ رہے ہیں۔
وزیر اعظم شہباز شریف اور سعودی ولی عہد محمد بن سلمان کے درمیان ہونے والی یہ ملاقات پاک سعودی تعلقات کی اہمیت اور مشترکہ اہداف کی عکاس ہے، جس کا مقصد دونوں ممالک کے درمیان تعاون کو مزید فروغ دینا ہے۔
