وزیر خزانہ سینیٹر محمد اورنگزیب نے کہا ہے کہ وزیراعظم کی قیادت میں بجلی کے نرخوں میں کمی کے اقدامات کیے جا رہے ہیں اور اس حوالے سے جلد ہی باضابطہ اعلان متوقع ہے۔
اسلام آباد: وزیر خزانہ سینیٹر محمد اورنگزیب نے کہا ہے کہ وزیراعظم کی قیادت میں بجلی کے نرخوں میں کمی کے اقدامات کیے جا رہے ہیں اور اس حوالے سے جلد ہی باضابطہ اعلان متوقع ہے۔ حکومت کی جانب سے یہ اقدام معیشت کو مستحکم کرنے اور کاروباری لاگت کو کم کرنے کے لیے اٹھایا جا رہا ہے، جس سے مینوفیکچرنگ سیکٹر کو فروغ ملے گا اور برآمدات میں اضافہ ہوگا۔
چین میں منعقدہ باؤ فورم کے دوران عالمی اشاعتی و نشریاتی ادارے بلوم برگ کو دیے گئے انٹرویو میں وزیر خزانہ نے بجلی کی قیمتوں میں کمی کے ساتھ ساتھ آئندہ بجٹ میں ٹیکس اصلاحات پر بھی روشنی ڈالی۔ ان کا کہنا تھا کہ حکومت ٹیکس کا دائرہ وسیع کرنے پر کام کر رہی ہے، جس کے تحت ریئل اسٹیٹ، ریٹیل اور زراعت جیسے شعبوں کو ٹیکس نظام میں شامل کیا جائے گا۔ اس اقدام کا مقصد مینوفیکچرنگ سیکٹر پر غیر ضروری ٹیکسوں کا بوجھ کم کرنا اور مجموعی ٹیکس آمدن میں اضافہ کرنا ہے۔
وزیر خزانہ نے مہنگائی کے رجحانات پر اطمینان کا اظہار کرتے ہوئے کہا کہ مجموعی اور بنیادی مہنگائی کی سطح پر گہری نظر رکھی جا رہی ہے۔ انہوں نے کہا کہ اس سال کے دوران شرح سود میں مزید کمی متوقع ہے، جس سے اقتصادی ترقی کے لیے حالات مزید بہتر ہوں گے۔
پاکستان کے مالیاتی نظام میں تنوع لانے کے حوالے سے وزیر خزانہ نے انکشاف کیا کہ ملک اس سال اپنا پہلا چینی یوان بانڈ جاری کرنے کا ارادہ رکھتا ہے، جس کی مالیت 200 سے 250 ملین ڈالر کے درمیان ہوگی۔ ان کا کہنا تھا کہ اس اقدام کا بنیادی مقصد فنڈنگ کے ذرائع میں تنوع پیدا کرنا اور موسمیاتی تبدیلی سے متعلق منصوبوں کے لیے مالی وسائل حاصل کرنا ہے۔
وزیر خزانہ نے مزید کہا کہ حکومت کی تمام تر توجہ معیشت کی بہتری اور ملکی برآمدات کو بڑھانے پر مرکوز ہے۔ آنے والے بجٹ میں ایسی پالیسیاں متعارف کرائی جائیں گی جو معیشت کو مستحکم کرنے، سرمایہ کاری کے مواقع پیدا کرنے اور صنعتی ترقی کے لیے سازگار ماحول فراہم کریں گی۔
