اسلام آباد، وزیراعظم شہباز شریف کی ہدایت پر وفاقی دارالحکومت میں کام کرنے والی خواتین کے لیے ہاسٹل بنانے کا فیصلہ کیا گیا ہے۔
اسلام آباد کے سیکٹر آئی-نائن میں واقع اسپیشل ایجوکیشن سینٹر کو ورکنگ ویمن ہاسٹل میں تبدیل کرنے کی منظوری دے دی گئی ہے۔ سی ڈی اے بورڈ نے منصوبے کی باضابطہ منظوری دے کر وزارت تعلیم کو نوٹیفکیشن جاری کر دیا ہے۔
یہ فیصلہ وزارت تعلیم اور وزارت انسانی حقوق کی درخواست پر کیا گیا، جنہوں نے ورکنگ خواتین کے رہائشی مسائل کے حل کے لیے ہاسٹل کی تعمیر کی تجویز دی تھی۔
سیکرٹری تعلیم محی الدین احمد وانی کے مطابق وزیر اعظم کی ہدایات پر عمل درآمد کرتے ہوئے اس منصوبے سے خواتین کو درپیش رہائشی مسائل میں کمی آئے گی، اور شہر میں موجود خواتین ملازمین کو بڑی سہولت میسر آئے گی۔
یاد رہے کہ وزیراعظم کی ہدایت پر اسلام آباد میں ورکنگ ویمن ہاسٹل بنانے کا فیصلہ اس لیے کیا گیا ہے تاکہ دوسرے شہروں سے آنے والی کام کرنے والی خواتین کو محفوظ، سستی اور معیاری رہائش میسر آسکے، اس اقدام کا مقصد خواتین کے رہائشی مسائل کا حل، انہیں بہتر سہولیات کی فراہمی اور محفوظ ماحول میں خودمختار زندگی گزارنے کا موقع دینا ہے۔
