اسلام آباد، وزیراعظم شہباز شریف کی جانب سے ملک میں مہنگائی مزید کم کرنے کی نوید سنا دی گئی۔
شہباز شریف نے صحافیوں سے گفتگو کے دوران کہا کہ ملکی معیشت کو ٹھیک کرنے کے لیے دن رات محنت کی ہے، مگر ابھی مزید محنت درکار ہے، آہستہ آہستہ عوام کو بہتر معیشت کے ثمرات مل رہے ہیں۔
وزیراعظم کا کہنا ہے کہ جب ملک کی باگ ڈور سنبھالی تو حالات انتہائی مشکل تھے، ہم نے حکومت کی بہتری کے لیے اقدامات کیے اور سفارشی کلچر کو ختم کرنے کی کوشش کی۔
شہباز شریف نے کہا کہ سیاسی جھگڑوں سے نفرت پھیلتی ہے، جو ملک کے لیے نقصان دہ ہے، پی ٹی آئی کے دور میں نفرت کا کلچر پروان چڑھا، جس نے ملک کو نقصان پہنچایا، باہمی اتفاق و اتحاد سے ہی ملک کو ترقی دی جاسکتی ہے۔
وزیراعظم کا کہنا ہے کہ الحمدللہ ملک میں مہنگائی کی شرح سنگل ڈیجیٹ پر آ گئی ہے، بینکوں کا مارک اپ ریٹ بہتر ہوا ہے، آنے والے دنوں میں مہنگائی کا گراف مزید کم ہو گا، ان شا اللہ، اس کامیابی میں پوری ٹیم کی کاوش شامل ہے۔
وزیراعظم نے کہا کہ سرکاری افسران کو بھی دن رات محنت کرنا ہوگی، ملک کی ترقی کے لیے ہر اسٹیک ہولڈر کو خلوص نیت سے کام کرنا ہوگا، فوج ملکی سلامتی کے لیے جانوں کی قربانیاں دے رہی ہے۔
دوسری جانب محکمہ داخلہ پنجاب کی جانب سے 125 سالہ پرانے پریزن رولز میں ترامیم کر دی گئیں۔
محکمہ داخلہ پنجاب کے ترجمان کے مطابق پہلے مرحلے میں 138 جیل رولز تبدیل کر کے جدید تقاضوں سے ہم آہنگ کیے گئے ہیں، جیل رولز میں ترامیم انسانی حقوق کے تحفظ اور عالمی قوانین کی پاسداری کیلئے کی گئیں۔
