وزیراعظم شہباز شریف سے منیجنگ ڈائریکٹر آئی ایم ایف کرسٹالینا جارجیوا نے ملاقات کی جس میں آئی ایم ایف پروگرام سمیت دیگر اہم امور پر گفتگو کی گئی۔
وزیر اعظم ہاؤس کی جانب سے جاری کردہ اعلامیہ کے مطابق وزیراعظم نے آئی ایم ایف کی ٹیم کو معاشی استحکام کے لائحہ عمل، مؤثر کارکردگی اور منصوبہ بندی کی پائیداری کیلئے حکومتی عزم کا یقین دلایا۔
اس موقع پر وزیراعظم شہباز شریف کا کہنا تھا کہ ایم ڈی آئی ایم ایف سے ملاقات میں پاکستان کی معاشی ترقی اور جاری اصلاحات پر گفتگو کی گئی، ہم نے دیرپا ترقی اور معاشی استحکام کے مشترکہ عزم کا اعادہ کیا۔
شہباز شریف نے کہا کہ ہم میکرو استحکام سے دیر پا ترقی اور خوشحالی کے سفر پر آئی ایم ایف کے مدد کی قدر کرتے ہیں۔
ملاقات میں ایم ڈی آئی ایم ایف نے پروگرام مؤثر طریقے سے نافذ کرنے میں پاکستان کی کوششوں اور اصلاحاتی ایجنڈے پر عملدرآمد کے لیے وزیراعظم کے ذاتی عزم کو سراہا۔
اس موقع پر کرسٹالینا جارجیوا کا کہنا تھا وزیراعظم شہباز شریف سے ہونیوالی ملاقات شاندار رہی، پاکستان میں آئی ایم ایف کی حمایت یافتہ اصلاحات پر وزیراعظم کا عزم حوصلہ افزاء ہے۔
کرسٹالینا جارجیوا نے کہا کہ پاکستان میں نوجوانوں کی ترقی اور روزگار سے متعلق فیصلہ کن اقدامات کی حمایت کرتے ہیں۔
کرسٹالینا جارجیوا کا مزید کہنا تھا کہ پاکستان کی معیشت استحکام کےبعد ترقی کی جانب گامزن ہو رہی ہے۔
