نوشہرہ، دارالعلوم حقانیہ اکوڑہ خٹک کی جامع مسجد میں نماز جمعہ کے بعد خارجی راستے میں ہونیوالے خود کش دھماکے کا مقدمہ درج کرلیا گیا۔
دارالعلوم حقانیہ نوشہرہ میں خود کش حملے کا مقدمہ مولانا حامد الحق حقانی کے بیٹے عبدالحق ثانی کی مدعیت میں سی ٹی ڈی مردان میں نامعلوم ملزمان کے خلاف درج کیا گیا۔
مقدمے میں انسدادِدہشت گردی ،قتل سمیت دیگردفعات شامل کی گئی ہیں۔
سی ٹی ڈی کی جانب سے خودکش بمبار کی شناخت میں عوام سے مدد کی اپیل کی گئی ہے،اطلاع دینے والے کے لیے 5 لاکھ روپے انعام کا اعلان بھی کیا گیا ہے۔
یاد رہے کہ جمعہ کو خود کش دھماکے میں جے یو آئی (س) کے سربراہ مولانا حامد الحق حقانی سمیت 8افراد شہید اور 17سے زیادہ زخمی ہوئے تھے۔
دوسری جانب گورنر پنجاب سردار سلیم حیدر خان کا کہنا ہے کہ ہم نے پنجاب کو فوکس کرنا ہے اور پیپلز پارٹی کو بحال کرنا ہے۔
میڈیا سے گفتگو کے دوران گورنر پنجاب سردار سلیم حیدر خان کا کہنا ہے کہ صدر پاکستان لاہور آئے، انہوں نے مختلف میٹنگز کیں، آصف زرداری نے لاہور گورنر ہاؤس میں پیپلزپارٹی کے سینئر رہنماؤں سے ملاقات کی، پارلیمانی پارٹی پنجاب سے بھی ملاقات کی گئی۔
سردار سلیم حیدر کا کہنا ہے کہ آصف زرداری نے سینئر قیادت سے پنجاب میں سیاسی معاملات کو آگے بڑھانے کے حوالے سے مشاورت کی، اب لگاتار صدر پاکستان اور بلاول بھٹو زرداری لاہور میں آتے رہیں گے۔
