اوسلو، نوبیل انسٹیٹیوٹ نے پاکستان تحریک انصاف کے بانی عمران خان کی نوبیل انعام کے لیے نامزدگی کی خبروں کو ایک سیاسی حکمتِ عملی قرار دیا ہے۔
نوبیل انسٹیٹیوٹ کے ڈائریکٹر کرسٹیان برگ ہارپ ویکن نے ناروے کے ایک معروف اخبار میں مضمون تحریر کیا، جس میں انہوں نے اس نامزدگی پر سخت تحفظات کا اظہار کیا۔
ہارپ ویکن کا کہنا تھا کہ باضابطہ اعلان سے قبل ہی اس معاملے کو اچھال کر ناروے میں مقیم پاکستانی ووٹرز کو متاثر کرنے کی کوشش کی گئی، انہوں نے کہا کہ یہ پہلا موقع ہے جب کسی سیاسی رہنما کی نوبیل انعام کے لیے نامزدگی کو اس انداز میں استعمال کیا گیا، جس سے انعام کی ساکھ متاثر ہو سکتی ہے۔
یاد رہے کہ حالیہ دنوں میں ناروے کی سینٹر پارٹی نے عمران خان کو امن کے نوبیل انعام کے لیے نامزد کرنے کا اعلان کیا تھا، جس پر مختلف حلقوں کی جانب سے شدید ردعمل سامنے آیا۔
نوبیل انسٹیٹیوٹ نے واضح کیا کہ نوبیل انعام کی نامزدگی اور فیصلے کے لیے ایک سخت ضابطہ کار موجود ہے اور اسے کسی بھی طرح سیاسی مقاصد کے لیے استعمال کرنا ناقابلِ قبول ہے۔
