لاہور، سابق وزیراعظم نواز شریف نے ایک طویل وقفے کے بعد سیاست میں دوبارہ قدم رکھ دیا ہے۔
عوامی رابطہ مہم کے تحت انہوں نے ملک بھر میں جلسوں اور ریلیوں کا آغاز کرنے کا فیصلہ کیا ہے، جس کا پہلا مرحلہ پنجاب سے شروع ہوگا۔
نواز شریف نے بلوچستان کے دیرینہ مسائل کے حل کے لیے اپنا کردار ادا کرنے کی آمادگی کا اظہار بھی کیا ہے۔
اسی تناظر میں بلوچستان کے سابق وزیراعلیٰ ڈاکٹر عبدالمالک نے لاہور میں نواز شریف سے ملاقات کی، جس میں انہوں نے صوبے کے مسائل کے حل کے لیے نواز شریف سے عملی کردار ادا کرنے کی درخواست کی۔
نواز شریف نے انہیں یقین دہانی کروائی کہ وہ سیاسی اور جمہوری میدان میں اپنی ذمہ داریاں نبھائیں گے۔
دوسری جانب وزیر مملکت برائے داخلہ طلال چودھری نے کہا ہے کہ عدالتی فیصلے کے بعد حکومت کو اب کسی کو پاکستان تحریک انصاف (پی ٹی آئی) کے بانی پی ٹی آئی عمران خان سے ملاقات سے روکنے کی ضرورت نہیں، کیونکہ وہ خود ہی بہت سے افراد سے نہیں ملنا چاہتے۔
نجی ٹی وی چینل پروگرام میں گفتگو کرتے ہوئے طلال چودھری کا کہنا تھا کہ پی ٹی آئی میں ہر کوئی اپنی علیحدہ راہ پر گامزن ہے، یہ لوگ ایک مضبوط جماعت ہونے کے باوجود اسے سنبھالنے میں ناکام دکھائی دیتے ہیں۔
