وزیراعلیٰ مریم نواز نے نئے سال کی تقریبات اور سکیورٹی انتظامات سے متعلق خصوصی ہدایات جاری کر دیں۔
لاہور، وزیر اعلیٰ پنجاب مریم نواز شریف نے نئے سال کی تقریبات اور سکیورٹی انتظامات سے متعلق خصوصی ہدایات جاری کر دیں۔
وزیر اعلیٰ مریم نواز شریف کی جانب سے عوام کے تحفظ کو یقینی بنانے کے لیے سکیورٹی انتظامات مزید سخت کرنے کا حکم دے دیاگیا، مریم نواز نے کہا کہ عوامی مقامات، پارکس، شاپنگ مالز اور دیگر مقامات پر سکیورٹی کو فول پروف بنایا جائے۔
وزیراعلیٰ پنجاب نے کہا کہ پولیس اور انتظامیہ عوام کے تعاون سے ہر قسم کے غیر قانونی اقدامات کی روک تھام کرے، کسی بھی مشکوک سرگرمی پر فوری کارروائی کی جائے۔
وزیر اعلیٰ پنجاب نے کہا کہ عوام نئے سال کی خوشیوں کو ذمہ داری سے منائیں، ہوائی فائرنگ اور دیگر خطرناک سرگرمیوں سے گریز کریں، قانون کی خلاف ورزی کرنے اور قیمتی انسانی جانوں کو بھی خطرے میں ڈالنے والوں کے خلاف کارروائی کی جائے گی۔
مریم نواز کا کہنا ہے کہ عوام ذمہ دار شہری ہونے کا ثبوت دیں اور قانون نافذ کرنیوالے اداروں کے ساتھ تعاون کریں، شراب نوشی و خرید و فروخت کے ایس او پیز پر عملدرآمد نہ کرنے والوں کے خلاف کارروائی ہوگی۔
