قومی ہیرو گولڈ میڈلسٹ ارشد ندیم کا کہنا ہے کہ میرے سُسر تو اتنے امیر ہیں، وہ بھینس کی جگہ 5 سے 6 ایکڑ زمین بھی دے سکتے ہیں۔
نجی ٹی وی چینل کو انٹرویو دیتے ہوئے ارشد ندیم نے اپنے سُسر کے دیے گئے تحفے (بھینس) پر ردِ عمل کا اظہا ر کرتے ہوئے کہا کہ مجھے معلوم نہیں تھا کہ میرے سُسر نے ایسا کوئی اعلان کیا ہے۔
ارشد ندیم کا کہنا تھا کہ میری زوجہ کو بھی ٹی وی کے ذریعے ہی اس اعلان اور انعام کا پتا چلا تھا، اہلیہ سے بھینس کے تحفے کا سُن کر میں نے کہا تھا کہ میرے سُسر اچھے خاصے امیر ہیں وہ بھینس کی جگہ 5 سے 6 ایکڑ زمین ہی دے دیتے۔
قومی ہیرو کا کہنا تھا کہ سُسر کے پاس ڈیڑھ دو مربع زمین ہے، مجھے بطور تحفہ کوئی پانچ ایکڑ زمین ہی دے دیتے،صرف بھینس ہی دی ہے، چلو خیر ہے۔
انٹرویو کے موقع پر ارشد ندیم کی زوجہ نے بتایا کہ ہماری محبت کی شادی تھی، ہمارے 3 بچے ہیں،1 بیٹی اور 2 بیٹے ہیں، جب ارشد اولمپکس کے لیے گئے تھے تو میں نے اِنہیں بتا دیا تھا کہ یہ گولڈ میڈل صرف اور صرف آپ کا ہی ہے اور آپکو ہی ملے گا۔
یاد رہے کہ ارشد ندیم کے گولڈ میڈل جیتنے کے بعد سے ان پر حکومت و پاکستانی عوام کی جانب سے انعامات کی برسات کا سلسلہ تاحال جاری ہے۔
