اسلام آباد، وزیرِ اعظم شہباز شریف نے کہا ہے کہ ملکی آمدن میں اضافہ برآمدات کے ذریعے حکومت کی ترجیحات میں شامل ہے۔
وزیرِ اعظم محمد شہباز شریف کی زیر صدارت برآمدات سہولت سکیم (EFS) پر جائزہ اجلاس منعقد ہوا، جس میں برآمدات سہولت سکیم کو مزید مؤثر بنانے اور برآمدی شعبے کے استفادے کو یقینی بنانے کے لیے قائم کمیٹی کی عبوری سفارشات پیش کی گئیں۔
اجلاس سے خطاب کرتے ہوئے وزیرِ اعظم شہباز شریف نے کہا کہ برآمدی صنعتوں کے خام مال اور مشینری کی درآمد پر سہولت کے لیے سکیم کو مزید مؤثر بنانے کے حوالے سے کمیٹی کی سفارشات پر ماہرین سے مزید مشاورت کی جائے۔
انہوں نے ہدایت دی کہ کمیٹی عبوری سفارشات کو حتمی شکل دے کر جلد رپورٹ پیش کرے، اور آئندہ بجٹ کی تیاری میں صنعتوں اور کاروباری تنظیموں سے مشاورت کی جائے تاکہ ان کی تجاویز کو بجٹ میں شامل کیا جاسکے۔ انہوں نے مقامی صنعت کو مساوی مواقع فراہم کرنے کی بھی ہدایت دی۔
اجلاس میں وفاقی وزراء احسن اقبال، احد خان چیمہ، محمد اورنگزیب، علی پرویز ملک، سردار اویس خان لغاری، وزیرِ اعظم کے مشیر سید توقیر شاہ، وزیرِ اعظم کے کوآرڈینیٹر رانا احسان افضل، چیئرمین ایف بی آر راشد محمود لنگڑیال اور برآمدی صنعت سے تعلق رکھنے والی اہم شخصیات نے شرکت کی۔
دوسری جانب عوامی مسلم لیگ کے سربراہ اور سابق وفاقی وزیر شیخ رشید احمد نے کہا ہے کہ ابھی بولنے کا وقت نہیں آیا، جب وقت آئے گا تو ضرور بات کریں گے۔
سینئر سیاستدان نے یہ بات اسلام آباد کی ایک عدالت میں پیشی کے دوران میڈیا سے غیر رسمی گفتگو کرتے ہوئے کہی۔
