گیکیبرہا، دنیا کے سب سے معمر سابق ٹیسٹ کرکٹر رون ڈریپر 98 سال کی عمر میں جنوبی افریقا میں انتقال کر گئے۔
رون ڈریپر کا انتقال گیکیبرہا کے ایک ریٹائرمنٹ ہوم میں ہوا، ان کے اہل خانہ نے آج ان کے انتقال کی تصدیق کی۔
غیر ملکی میڈیا کا بتانا ہے کہ رون ڈریپر ایک ٹاپ آرڈر بلے باز اور جز وقتی وکٹ کیپر تھے، انہوں نے 1950 میں آسٹریلیا کے خلاف جنوبی افریقا کی جانب سے 2 ٹیسٹ میچز کھیلے تھے۔
رون ڈریپرکے انتقال کے بعد آسٹریلیا کے نیل ہاروی اب 96 سال کی عمر کیساتھ سب سے معمر ٹیسٹ کرکٹر بن گئے ہیں جو بقید حیات ہیں۔
رون ڈریپر 24 دسمبر 1926 کو پیدا ہوئے اور انہوں نے اپنی فرسٹ کلاس کرکٹ میں ایسٹرن پروونس کی جانب سے اورنج فری اسٹیٹ کے خلاف اپنے 19ویں یوم پیدائش پر سنچری اسکور کی۔
ڈریپر نے 60-1959 تک فرسٹ کلاس کرکٹ جاری رکھی اور 41.64 کی اوسط کیساتھ اپنا کریئر مکمل کیا۔
53-1952 کے سیزن میں انہوں نے مسلسل 2 میچوں میں لنچ سےپہلے سنچریاں اسکور کیں۔
دوسرے میچ میں ڈریپر نے دوسری اننگز میں بھی سنچری بنا کر جنوبی افریقہ کے طویل عرصے سے جاری کرکٹ مقابلے ’کری کپ‘ میں ایک ہی میچ میں 2 سنچریاں بنانیوالے پہلے کھلاڑی کا اعزاز حاصل کیا۔
