نوجوان مصطفیٰ عامر کے اغوا اور قتل کیس کے مرکزی ملزم ارمغان کی میڈیکل رپورٹ سامنے آگئی۔
کراچی: نوجوان مصطفیٰ عامر کے اغوا اور قتل کیس میں اہم پیش رفت سامنے آئی ہے۔ مرکزی ملزم ارمغان غازی کی میڈیکل رپورٹ منظرعام پر آ گئی، جس میں ملزم کی جسمانی حالت اور چوٹوں کے نشانات کا ذکر کیا گیا ہے۔
نجی ٹی وی چینل نے ملزم ارمغان کے 10 فروری کو کیے گئے میڈیکل کی رپورٹ حاصل کر لی ہے۔ رپورٹ کے مطابق، ملزم کو 3 بج کر 55 منٹ پر میڈیکو لیگل کے لیے پیش کیا گیا۔ تفتیشی افسر انسپکٹر امیر علی ملزم کو ہتھکڑی کے ساتھ جناح اسپتال لے کر آئے۔ رپورٹ میں کہا گیا ہے کہ ملزم کی حالت بہتر تھی اور وہ بات چیت کر رہا تھا۔ اس کا بلڈ پریشر نارمل تھا اور وہ مکمل ہوش و حواس میں تھا۔
رپورٹ میں مزید انکشاف ہوا کہ ملزم کے کولہوں پر سرخ نشانات موجود تھے۔ اس کے علاوہ، کانوں کے پیچھے اور کہنیوں پر بھی کسی سخت چیز کی چوٹ کے سرخ نشانات پائے گئے۔
مرکزی ملزم ارمغان غازی کو 8 فروری کو کراچی کے علاقے ڈیفنس خیابانِ مومن میں پولیس مقابلے کے بعد گرفتار کیا گیا تھا۔ کیس کے شریک ملزم شیراز نے دورانِ تفتیش انکشاف کیا تھا کہ ارمغان نے مصطفیٰ کو پہلے بنگلے میں مارا، پھر اسے اس کی اپنی گاڑی کی ڈگی میں ڈال کر حب لے گئے، جہاں ارمغان نے پیٹرول چھڑک کر گاڑی کو آگ لگا دی۔
گزشتہ روز عدالت نے ارمغان غازی کو 4 روزہ جسمانی ریمانڈ پر پولیس کے حوالے کر دیا تھا۔
