لاہور، وزیراعلیٰ پنجاب مریم نواز کی جانب سے آئندہ ماہ صوبہ بھر میں 20 ہزار گھروں کی تعمیر کا ہدف دے دیا گیا۔
وزیراعلیٰ پنجاب مریم نواز کی زیر صدارت خصوصی اجلاس ہوا، جس میں اپنی چھت اپنا گھر پروگرام کے منصوبے پر پیشرفت کا تفصیلی جائزہ لیا گیا۔
خصوصی اجلاس میں بے گھر شہریوں کو مفت پلاٹ دینے کیلئے اسکیم کا تفصیلی جائزہ بھی لیا گیا، سفارشات اور تجاویز پر غور کر کے 9 ہزار 15 مکانوں کی تعمیر کے لئے 8 ارب 20 کروڑ روپے کے قرضے جاری کیے گئے ہیں۔
بریفنگ دیتے ہوئے یہ بتایا گیا کہ 2050 افراد کو مکانات کی تعمیرات کیلئے قرض کی دوسری قسط بھی مل گئی، اپنی چھت اپنا گھر پروگرام کے تحت 4841 گھر تکمیل کے مراحل میں ہیں، اپنی چھت اپنا گھر پورٹل پر وزٹ کرنے والے شہریوں کی تعداد 7 لاکھ 28 ہزار سے بڑھ گئی ہے۔
بریفنگ میں یہ بتایا گیا ہے کہ اپنی چھت اپنا گھر پروگرام کیلئے تقریباً 4 لاکھ سے زائد درخواستیں مکمل دستاویزات کے ساتھ آگئی ہیں، 74 ہزار سے زائد ڈرافٹ درخواستیں بھی اپنی چھت اپنا گھر پورٹل میں جمع ہیں۔
وزیراعلیٰ پنجاب مریم نواز کی ہدایت پر 3 اور 5 مرلے کی ہاؤسنگ اسکیموں کا بھی جائزہ لیا گیا، عوام کو فری پلاٹ دینے کے لئے ٹی او آرز طے کرنے کے لئے 8 رکنی کمیٹی قائم کر دی گئی، مریم نواز نے صوبہ پنجاب میں گھر بنانے کا ہدف پورا کرنے کا حکم دیا ہے۔
