84
چیئرمین پاکستان تحریک انصاف بیرسٹر گوہر کا کہنا ہے کہ انشاءاللہ کل بروز جمعرات حکومت اور پی ٹی آئی کے مابین مذاکرات کا تیسرا سیشن ہو رہا ہے۔ ہم مذاکرات کے تیسرے دور میں اپنے مطالبات لکھ کر حکومت کے سامنے رکھیں گے۔
اسلام آباد سیشن کورٹ کے باہر میڈیا سے گفتگو کرتے ہوئے چیئرمین پی ٹی آئی کا کہنا تھا کہ امید ہے حکومت ہمارے مطالبات پر سنجیدگی سے غور کرے گی۔
کیونکہ سنجیدگی، کھلے دل، نیک نیتی کے ساتھ بیٹھیں گے تو تمام مسائل کا حل نکل آئے گا۔
ان کا مزید کہنا تھا کہ تحریک انصاف کے سیاسی قیدی گزشتہ ڈیڑھ دو سال سے تکلیف میں ہیں۔ کارکنان جیلوں میں بند ہیں انہیں ضمانتیں نہیں مل رہیں۔
سیاسی قیدیوں کی رہائی جمہوریت کیلئے بھی بے حد ضروری ہے لیکن اب امید ہے کہ یہ پراسیس جلد مکمل ہوگا اور خوشی کی خبر آئے گی۔
چیئرمین پی ٹی آئی کا بانی پی ٹی آئی کے کیسز کے حوالے سے کہنا تھا کہ عمران خان نے کوئی جرم نہیں کیا لیکن انکے خلاف جتنے کیسز بنائے جا سکتے تھے وہ بنوائے گئے۔
