اسلام آباد، وفاقی وزیر داخلہ محسن نقوی نے خیبرپختونخوا میں تین تھانوں پر دہشت گردوں کے حملے ناکام بنانے پر پولیس کی بہادری کو سراہا ہے۔
اپنے بیان میں محسن نقوی کا کہنا تھا کہ خیبرپختونخوا پولیس نے جرات و بہادری کے ساتھ دہشت گردوں کا مقابلہ کیا اور ان کے حملوں کو پسپا کیا، دہشت گردوں کے ناپاک عزائم کو ناکام بنانے پر خیبرپختونخوا پولیس کے بہادر اہلکاروں کو سلام پیش کرتے ہیں۔
محسن نقوی نے مزید کہا کہ خیبرپختونخوا پولیس دہشت گردوں کے خاتمے کے لیے فرنٹ لائن پر لڑ رہی ہے، اور ہمیشہ دلیری سے ان کا مقابلہ کیا ہے۔ ان کا کہنا تھا کہ ان شاء اللہ تمام ادارے مل کر دہشت گردی کے مذموم عزائم کو ناکام بنائیں گے۔
دوسری جانب پاکستان تحریک انصاف پارلیمنٹرینز کے چیئرمین اور سابق وزیر اعلیٰ محمود خان نے خیبرپختونخوا کے وزیر اعلیٰ علی امین گنڈاپور پر کڑی تنقید کی ہے۔
اپنے ایک بیان میں محمود خان نے کہا کہ علی امین گنڈاپور کو نعرے لگانے کے بجائے صوبے کے مسائل کے حل پر توجہ دینی چاہیے، خیبرپختونخوا مشکلات میں گھرا ہوا ہے۔
