لاہور ہائیکورٹ میں بانی پی ٹی آئی کے نام کی نشریات پر پابندی کے خلاف سماعت

لاہور ہائیکورٹ میں پاکستان تحریک انصاف (پی ٹی آئی) کے بانی کا نام میڈیا پر نشر کرنے کی پابندی کے خلاف درخواست پر سماعت ہوئی۔

جسٹس شمس محمود مرزا کی سربراہی میں تین رکنی فل بینچ نے کیس کی سماعت کی، جس میں درخواست گزاروں کے وکلاء کو ترمیمی قانون کی روشنی میں دلائل دینے کے لیے طلب کیا گیا۔ عدالت نے مزید سماعت غیر معینہ مدت تک ملتوی کر دی۔

پیمرا کے وکیل نے عدالت میں ترمیمی قانون جمع کراتے ہوئے مؤقف اختیار کیا کہ پیمرا ایک خودمختار ادارہ ہے، اور اس کے معاملات کو براہ راست عدالت میں چیلنج نہیں کیا جا سکتا۔ لہٰذا، درخواستیں ترمیمی ایکٹ کے تحت مسترد کی جانی چاہئیں۔

دوسری جانب، بانی پی ٹی آئی کے وکیل بیرسٹر احمد پنسوتہ نے مؤقف پیش کیا کہ پیمرا کی ہدایات کے باعث میڈیا پر بانی پی ٹی آئی کا نام نشر نہیں کیا جا رہا، جو کہ آئین کے تحت امتیازی سلوک کے زمرے میں آتا ہے۔ انہوں نے عدالت سے درخواست کی کہ بانی پی ٹی آئی کا نام میڈیا پر نشر کرنے کی اجازت دی جائے۔