لاہور، ڈی آئی جی آپریشنز لاہور فیصل کامران نے کہا ہے کہ لاہور میں کالج کی طالبہ سے زیادتی کے کوئی شواہد نہیں ملے۔
نیوز کانفرنس کرتے ہوئے فیصل کامران کا کہنا تھا کہ سوشل میڈیا پر جھوٹا پروپیگنڈا کیا گیا ہے جس کے بعد طلبہ کی جانب سے احتجاج کیا گیا، کسی مبینہ متاثرہ بچی کی نشاندہی نہیں ہوئی، جب کوئی وکٹم ہی سامنے نہیں آیا تو ایف آئی آر کس کیخلاف کاٹیں؟
ڈی آئی جی آپریشنز کے مطابق ابھی تک کوئی لڑکی سامنے آئی نہ اسکے والدین، کالج کے سی سی ٹی وی کیمرے دیکھے، گارڈ زکی نقل و حرکت بھی دیکھی، لاہور کے تمام ہسپتالوں کے ریکارڈزبھی چیک کیے گئے، ایسے کسی بھی واقعے کے شواہد نہیں ملے۔
فیصل کامران کا کہنا تھا کہ جب تک تصدیق نہیں ہوتی طلبہ پرسکون رہیں، والدین کو کہوں گا کہ بغیر کسی تصدیق کے کوئی بھی معلومات ہو یقین نہ کریں، اپنے بچوں کو بھی یہ پیغام دیں، کسی کے پاس مصدقہ اطلاع ہے تو دیں ہم فوری کارروائی کریں گے۔
یاد رہے کہ پنجاب کی حکومت نے عجلت میں بغیر کسی ثبوت اور شواہد کے جانبدار کارروائی کرتے ہوئے کالج کی رجسٹریشن معطل کر دی جبکہ پنجاب پولیس کے افسر کا موقف ہے کہ اس طرح کا واقعہ تو رونما ہی نہیں ہوا۔
