لاہور میں بڑھتی ہوئی اسموگ کی وجہ سے حکومت نے مختلف علاقوں میں "گرین لاک ڈاؤن” نافذ کر دیا ہے۔
لاہور میں بڑھتی ہوئی اسموگ کی وجہ سے حکومت نے مختلف علاقوں میں "گرین لاک ڈاؤن” نافذ کر دیا ہے۔ نوٹیفکیشن کے مطابق ڈیوس روڈ، ایجرٹن روڈ، ڈیورنڈ روڈ، کشمیر روڈ اور ان سے ملحقہ علاقوں میں گرین لاک ڈاؤن نافذ کیا گیا ہے۔ مزید برآں، ایبٹ روڈ، شملہ پہاڑی سے گلستان سنیما اور ریلوے ہیڈکوارٹرز تک ایمپریس روڈ پر بھی یہ پابندی لاگو ہے۔
گرین لاک ڈاؤن کے تحت ان علاقوں میں تعمیراتی سرگرمیوں پر مکمل پابندی عائد کی گئی ہے جبکہ موٹرسائیکل رکشوں کا چلنا بھی ممنوع قرار دیا گیا ہے۔ ساتھ ہی ساتھ کمرشل جنریٹرز اور کھلے بار بی کیو پوائنٹس کو رات 8 بجے کے بعد بند رکھنے کی ہدایت جاری کی گئی ہے، اور کوئلے اور لکڑی جلانے والے فوڈ پوائنٹس پر بھی پابندی عائد کی گئی ہے۔ اس کے علاوہ رات 10 بجے کے بعد شادی ہالز کو کھلا رکھنے پر بھی مکمل پابندی ہوگی۔
صفائی کے عمل کے لیے بھی اقدامات کیے گئے ہیں، اور صفائی کمپنی کے سوا کسی بھی جگہ پر چھڑکاؤ اور جھاڑو دینے پر پابندی عائد کردی گئی ہے۔ گرین لاک ڈاؤن والے علاقوں میں 4 نومبر سے تمام سرکاری اور نجی دفاتر کو ورک فرام ہوم کے انتظامات یقینی بنانے کی ہدایت دی گئی ہے۔
سینئر وزیر مریم اورنگزیب نے اعلان کیا ہے کہ خصوصی بچوں کے اسکولوں میں کل سے چھٹی ہوگی اور اگر حالات مزید بگڑے تو پرائمری اسکولوں میں بھی چھٹی دینے پر غور کیا جائے گا۔
