قومی ٹی ٹوئنٹی کپ کے فائنل میچ میں شاندار کارکردگی کا مظاہرہ کرتے ہوئے لاہور بلوز نے ٹائٹل اپنے نام کرلیا۔
قومی ٹی ٹوئنٹی کپ کے فائنل میں شاندار کارکردگی کا مظاہرہ کرتے ہوئے لاہور بلوز نے ٹائٹل جیت لیا۔ حسین طلعت کی قیادت میں ٹیم نے اقبال اسٹیڈیم فیصل آباد میں ہونے والے فائنل میں پشاور کو 9 وکٹوں سے شکست دی۔
پشاور نے ٹاس جیت کر پہلے بیٹنگ کا فیصلہ کیا اور 9 وکٹوں پر 110 رنز بنائے۔ ٹیم کی امیدیں ایونٹ میں تین سنچریاں بنانے والے صاحبزادہ فرحان سے وابستہ تھیں، تاہم وہ صرف 17 رنز بنا کر آؤٹ ہوگئے۔ کپتان افتخار احمد 34 رنز کے ساتھ ٹاپ اسکورر رہے، جبکہ وکٹ کیپر ذوالکفل نے 32 رنز کی اننگز کھیلی۔ لاہور بلوز کے محمد سلمان مرزا نے صرف 21 رنز دے کر 4 وکٹیں حاصل کیں، جبکہ محمد عرفان نے 2 کھلاڑیوں کو آؤٹ کیا۔
جواب میں لاہور بلوز نے مطلوبہ ہدف 16 اوورز میں ہی حاصل کرلیا۔ عمر صدیق نے 6 چوکوں اور 2 چھکوں کی مدد سے ناقابل شکست 64 رنز بنائے، جبکہ جنید علی 30 رنز بنا کر ناٹ آؤٹ رہے۔ محمد سلمان مرزا کو فائنل میں شاندار بولنگ پر پلیئر آف دی میچ کا ایوارڈ دیا گیا۔
ایونٹ میں 121 کی اوسط سے 605 رنز بنانے والے صاحبزادہ فرحان کو بہترین بیٹر اور پلیئر آف دی ٹورنامنٹ قرار دیا گیا۔ سیالکوٹ کے حسن علی 13 وکٹوں کے ساتھ بہترین بولر بنے، جبکہ لاہور وائٹس کے محمد اخلاق بہترین وکٹ کیپر قرار پائے، انہوں نے 114 رنز بنانے کے ساتھ 4 کیچز اور 2 اسٹمپڈ کیے۔
قبل ازیں بدھ کی شب کھیلے گئے دوسرے سیمی فائنل میں لاہور بلوز نے ملتان کو 5 رنز سے شکست دے کر فائنل میں جگہ بنائی تھی۔
