فرانس، مارسیلی میں واقع روسی قونصل خانے پر دھماکہ خیز مواد سے حملہ کیا گیا۔
پولیس کا بتانا ہے کہ سوموار کو قونصل خانے کے احاطے میں دھماکہ خیز مواد سے بھری 3 بوتلیں پھینکی گئیں جن میں سے 2 دھماکے سے پھٹ گئیں۔
پولیس نے کہا کہ یہ بوتلیں قونصل خانے کے باغیچے میں گریں اور ماہرین ان کے مواد کا تجزیہ کر رہے ہیں۔
اس واقعے کے بعد قونصل خانے کے عملے کو کچھ دیر کے لیے عمارت کے اندر ہی رہنے کی ہدایت کی گئی اور اس دوران بم ڈسپوزل اسکواڈ نے علاقے کا معائنہ کیا۔
روسی قونصل خانے پر ہونیوالے اس حملے میں کسی جانی نقصان کی اطلاع نہیں ملی۔
روس کی جانب سے اس حملے کو دہشت گردی قرار دیتے ہوئے فرانس سے سکیورٹی اقدامات کے حوالے سے وضاحت طلب کی گئی ہے، روس کی سرکاری نیوز ایجنسی تاس کے مطابق روسی حکام نے فرانس سے مکمل تحقیقات کا مطالبہ بھی کیا ہے۔
یہ افسوسناک واقعہ ایسے وقت میں پیش آیا، جب یوکرین پر روسی حملے کو آج 3 سال مکمل ہو رہے ہیں۔
روسی وزارت خارجہ کے ترجمان کا کہنا ہے کہ مارسیلی میں روسی قونصل خانے کے احاطے میں ہونے والے دھماکے میں دہشت گردی کے تمام آثار موجود ہیں۔
فرانسیسی حکام کی جانب سے تحقیقات کا آغاز کر دیا گیا ہے، تاہم اس حملے کے پس پردہ مقاصد اور ملزمان کے بارے میں ابھی تک کوئی تفصیلات سامنے نہیں آئیں۔
فرانسیسی حکومت نے بھی اس حملے کی مذمت کی ہے۔
