سینیٹر فیصل واوڈا کی جانب سے قائمہ کمیٹی کے اجلاس میں 3 ایف بی آر افسران کی طرف سے قتل کی دھمکیوں کے الزام پر ایف بی آر آفیسرز ایسوسی ایشن کا ردعمل سامنے آگیا۔
ایف بی آر ان لینڈ ریونیو سروس آفیسرز ایسوسی ایشن کی جانب سے سینیٹر فیصل واوڈا کے الزامات پر ردعمل دیتے ہوئے کہا گیا کہ فیصل واوڈا کے الزامات کی سختی سے تردید کرتے ہیں، ان لینڈ ریونیو سروس افسران نے فیصل واوڈا کو کوئی دھمکیاں نہیں دیں۔
ان لینڈ ریونیو سروس آفیسرز ایسوسی ایشن کا کہنا ہے کہ سرکاری گاڑیوں کی خریداری قواعد کے مطابق ہوئی، افسران کو بدنام کرنے کی کوشش ناقابل قبول ہے۔
بیان کے مطابق سینیٹر فیصل واوڈا اپنے الزامات کے ثبوت پیش کریں، بے بنیاد بیانات افسران کے حوصلے پست کر رہے ہیں۔ ٹیکس وصولی کے عمل کو نقصان پہنچ سکتا ہے، افسران ایمانداری اور پیشہ ورانہ اصولوں پر کاربند ہیں، افسران کی عزت اوروقار کا ہر حال میں دفاع کریں گے۔
واضح رہے کہ گزشتہ روز سینیٹ کی قائمہ کمیٹی برائے خزانہ کا اجلاس چیئرمین سلیم مانڈوی والا کی زیر صدارت ہوا جس میں ایف بی آر کی جانب سے 1010 گاڑیوں کی خریداری کا معاملہ زیر بحث آیا۔
اجلاس میں رکن کمیٹی سینیٹر فیصل واوڈ کی جانب سے انکشاف کیا گیا کہ ایف بی آر کے 3 افسران نے مجھے جان سے مارنے کی دھمکیاں دیں، اس معاملے پر تو کرمنل کارروائی بنتی ہے۔
اس پر چیئرمین سینیٹ کمیٹی برائے خزانہ سلیم مانڈوی والا نے بتایا کہ انہیں بھی اس حوالے سے کچھ پیغامات ملے ہیں۔
