اسلام آباد، بین الاقوامی کریڈٹ ریٹنگ ایجنسی فچ نے پاکستان کی معیشت کے حوالے سے مثبت اشارہ دیتے ہوئے ملک کی کریڈٹ ریٹنگ میں بہتری کر دی ہے۔
نجی ٹی وی چینل کے مطابق، فچ نے پاکستان کی معاشی صورتحال کو "مستحکم” قرار دیا ہے اور پاکستان کی ریٹنگ ٹرپل سی پلس سے بڑھا کر بی مائنس کر دی ہے۔
فچ کی جانب سے جاری کردہ اعلامیہ میں کہا گیا ہے کہ پاکستان کی طویل مدتی غیر ملکی قرضہ جاتی ریٹنگ کو اپ گریڈ کیا گیا ہے، جبکہ مقامی کرنسی میں قرضہ جات کی ریٹنگ بھی بی مائنس مقرر کی گئی ہے۔
معاشی آؤٹ لک کو منفی سے تبدیل کر کے مستحکم کر دیا گیا ہے۔ اعلامیہ کے مطابق یہ بہتری پاکستان کی جانب سے بجٹ خسارہ کم کرنے، معاشی اصلاحات کو جاری رکھنے اور آئی ایم ایف پروگرام پر بہتر عملدرآمد کا نتیجہ ہے۔
فچ کا کہنا ہے کہ پاکستان کی فنڈنگ تک رسائی میں بہتری آئی ہے، اور توقع ظاہر کی گئی ہے کہ جون 2025 تک مجموعی بجٹ خسارہ کم ہو کر 6 فیصد رہ جائے گا، جبکہ درمیانی مدت میں یہ 5 فیصد تک محدود رہنے کی امید ہے، مالی سال 2024 میں بجٹ خسارہ تقریباً 7 فیصد تھا۔
