لاہور، پولیس کی جانب سے سابق وفاقی وزیر فواد چودھری کو 9 مئی کے 5 مقدمات میں قصور وار قرار دے دیا گیا۔
انسداد دہشتگردی عدالت لاہور کے جج منظر علی گل نے فواد چودھری کی عبوری ضمانتوں پر سماعت کی۔
سماعت کے دوران پولیس نے فواد چودھری کی تفتیشی رپورٹ عدالت میں جمع کرائی، رپورٹ میں پولیس نے سابق وفاقی وزیر فواد چودھری کو 9 مئی کے پانچ مقدمات میں قصور وار قرار دے دیا۔
اس موقع پر سابق وفاقی وزیر نے اپنے سینئر وکیل کی غیر حاضری کے باعث سماعت ملتوی کرنے کی استدعا کی۔
عدالت کی جانب سے فواد چودھری کی استدعا منظور کرتے ہوئے آئندہ سماعت پر وکلاء کو دلائل کیلئے طلب کر لیا گیا۔
واضح رہے کہ فواد چودھری نے راحت بیکری کے باہر، شیر پاؤ پل سمیت دیگر جلاؤ گھیراؤ کے مقدمات میں عبوری ضمانت کروا رکھی ہے۔
انسداد دہشت گردی عدالت کے باہر میڈیا سے گفتگو کے دوران سابق وفاقی وزیر فواد چودھری نے کہا کہ رمضان المبارک میں آسانیوں کے بجائے 50 وزیر بنا دئیے ہیں، امریکا گورنمنٹ چھوٹی کر رہا ہے، ہم بڑی کر رہے ہیں، حکومت چل نہیں رہی گھسیٹ رہی ہے، حکومت الیکشن ہار گئی دھاندلی ہی ان کے پاؤں کی بیڑیاں ہیں، ہر طبقہ سے یہ حکومت بلیک میل ہو رہی ہے۔
پنجاب بھر کی جیلوں کو سولر انرجی پر منتقل کرنے کا فیصلہ
سابق وزیر کا کہنا ہے کہ تحریک انصاف قیادت حالات سے فائدہ نہیں اٹھا رہی، پی ٹی آئی گرینڈ الائنس بنانے میں ابھی تک ناکام ہے، سٹریٹ پاور مولانا فضل الرحمان اور پی ٹی آئی کے پاس ہے اور مائنس فضل الرحمانکو کرنا چاہ رہے ہیں۔
فواد چوہدری کا کہنا ہے کہ نااہل اپوزیشن اور حکومت کے درمیان عوام پھنسی ہوئی ہے، موجودہ تحریک انصاف کےعہدیداروں کا کوئی سیاسی بیک گراونڈ نہیں ہے، 28 مقدمات کا سامنا کر رہا ہوں حالات پہلے اور اب بھی ہمارے لئے خراب ہیں، بانی پی ٹی آئی عمران خان سے مل کر موومنٹ چلانے کی اجازت لیں گے اگر ملاقات نہ ہو سکی تو خود ایکشن لیں گے، انتقام کے کلچر کو ختم کریں۔
