غزہ کے میڈیکل طلبہ و طالبات وفاقی دارالحکومت اسلام آباد پہنچ گئے ہیں۔
اسلام آباد، غزہ کے میڈیکل طلبہ و طالبات وفاقی دارالحکومت اسلام آباد پہنچ گئے ہیں، جہاں ان کا شاندار استقبال کیا گیا۔
یہ اقدام وزیراعظم پاکستان شہباز شریف کی خاص ہدایت پر کیا گیا، جنہوں نے غزہ کی تباہ کن صورتحال کو مدنظر رکھتے ہوئے فلسطینی طلبہ کو پاکستان میں اپنی تعلیم جاری رکھنے کی پیشکش کی تھی۔
کوآرڈینیٹر وزارت صحت ڈاکٹر مختار بھرتھ کا کہنا تھا کہ یہ طلبہ پاکستان کے میڈیکل اور ڈینٹل کالجز میں اپنی تعلیم جاری رکھیں گے، کیونکہ غزہ میں اسرائیلی بمباری کے باعث ان کے لیے تعلیم حاصل کرنا مشکل ہو چکا تھا۔
ڈاکٹر مختار بھرتھ کا کہنا تھا کہ پاکستان میں تعلیم مکمل کرنے کے بعد وہ اپنے ملک واپس جا کر لوگوں کی خدمت کر سکیں گے۔
کوآرڈینیٹر وزارت صحت نے یہ یقین دلایا کہ ان طلبہ کو ہر ممکن مدد فراہم کی جائے گی، جس میں خوراک، رہائش اور میڈیکل سہولیات شامل ہیں، حکومت وقت مشکل وقت میں فلسطینی طالبعلموں کیساتھ ہے، انہیں تعلیم فراہم کرنے میں کردار ادا کررہے ہیں۔
