اوکاڑہ اور ٹھٹھہ میں تیز رفتاری کے باعث خوفناک ٹریفک حادثے، ریسکیو ذرائع کے مطابق لاپروائی حادثات کی بڑی وجہ بنی۔
عید الفطر کے روز ملک کے مختلف علاقوں میں دو خوفناک ٹریفک حادثات میں 6 افراد جاں بحق ہو گئے، جن میں ایک ہی خاندان کے تین افراد بھی شامل ہیں۔
نجی ٹی وی چینل کے مطابق، اوکاڑہ کے نواحی گاؤں 33 فور ایل کے قریب ایک تیز رفتار لینڈ کروزر نے موٹرسائیکل کو ٹکر مار دی، جس کے نتیجے میں میاں، بیوی اور بیٹی موقع پر ہی جاں بحق ہو گئے۔
ریسکیو 1122 کے مطابق، حادثے میں جان کی بازی ہارنے والوں کی شناخت باسط، روبینہ اور فاطمہ کے نام سے ہوئی ہے۔ حادثے کی اطلاع ملتے ہی ریسکیو اہلکار موقع پر پہنچے اور لاشوں کو اسپتال منتقل کیا۔
ٹھٹھہ: دو موٹرسائیکلوں کے تصادم میں 3 افراد ہلاک، 1 زخمی
دوسری طرف، ٹھٹھہ کے علاقے میرپور ساکرو میں لدیا اسٹاپ کے قریب دو تیز رفتار موٹرسائیکلیں آپس میں ٹکرا گئیں، جس کے نتیجے میں 3 افراد جاں بحق اور 1 شدید زخمی ہو گیا۔
حادثے میں جاں بحق ہونے والوں کی شناخت ناظم شیدی (24 سال)، گلو کمبہار (27 سال) اور احمد شیدی (25 سال) کے نام سے ہوئی ہے، جبکہ شدید زخمی ندیم کمبہار (35 سال) کو کراچی کے اسپتال ریفر کر دیا گیا ہے۔
ریسکیو حکام کے مطابق، دونوں حادثات تیز رفتاری اور لاپروائی کی وجہ سے پیش آئے، جس کے باعث قیمتی جانیں ضائع ہوئیں۔
