پی ٹی آئی رہنماؤں عمر ایوب اور راجہ بشارت کو رہا کر دیا گیا۔
انسداد دہشتگردی عدالت راولپنڈی کی جانب سے دونوں کی ضمانت بعد از گرفتاری منظور کر لی گئی ہے، ضمانت منظور ہونے کے بعد انہیں رہائی مل گئی۔
پی ٹی آئی کے رہنماؤں عمر ایوب ، راجہ بشارت اور احمد چٹھہ کو راولپنڈی کی انسداد دہشتگردی عدالت میں پیش کیا گیا، اے ٹی سی کے جج امجد علی شاہ نے مقدمات پر سماعت کی۔
سماعت کے دوران عدالت کی جانب سے اپوزیشن لیڈر عمر ایوب و دیگر پی ٹی آئی رہنماؤں کی گرفتاری پر برہمی کا اظہار کرتے ہوئے کہا گیا کہ پشاور ہائیکورٹ سے ضمانت ہونے کے باوجود کیوں گرفتار کیا۔
اسکے بعد عدالت کی جانب سے عمر ایوب اور سابق صوبائی وزیر راجہ بشارت کو رہا کرنے کا حکم دے دیا گیا۔
واضح رہے کہ گزشتہ روز جی ایچ کیو حملہ کیس میں فرد جرم عائد ہونے کے بعد پی ٹی آئی رہنماؤں کو اڈیالہ جیل سے گرفتار کیا گیا تھا۔
یاد رہے کہ گزشتہ روز بانی تحریک انصاف عمران خان کے علاوہ شیخ رشید سمیت دیگر 100 ملزمان پر فرد جرم عائد کی گئی تھی، جی ایچ کیو حملہ کیس کا مقدمہ تھانہ آر اے بازار راولپنڈی میں درج ہے۔
