اسلام آباد ہائیکورٹ کی جانب سے عمران خان کے سابق سکیورٹی افسر کا نام پاسپورٹ کنٹرول لسٹ سے نکالنےکا حکم دے دیا گیا۔
اسلام آباد ہائیکورٹ کے جج جسٹس محمد آصف نے سابق وزیراعظم عمران خان کے سابق سکیورٹی افسر کا نام پاسپورٹ کنٹرول لسٹ سے نکالنے کی درخواست پر سماعت کی، جس دوران متعلقہ حکام عدالت میں پیش ہوئے۔
دوران سماعت عدالت کا کہنا ہے کہ ایف آئی اے رپورٹ کے مطابق پٹیشنرکا نام پی سی ایل، ای سی ایل میں ایکٹو ہے، متعدد ایف آئی آرزکی وجہ سے 24 اگست 2023 کو نام سفری پابندیوں کی لسٹ میں شامل کرنے کی سفارش کی گئی۔
عدالت کا کہنا ہے کہ انسداد دہشتگردی عدالت 18 اپریل 2024 کو درخواست گزار کی ضمانت منظور کرچکی ہے۔
جسٹس محمد آصف کی جانب سے ریمارکس دیے گئے کہ وفاقی حکومت کی منظوری سے سفری پابندیوں کی فہرست میں نام شامل کیا گیا، نام شامل کرکے آئین میں درج بنیادی حقوق کی خلاف ورزی کی گئی۔
بعداز سماعت اسلام آباد ہائیکورٹ نے عمر سلطان کا نام پی سی ایل میں شامل کرنا بلاجواز اور غیر قانونی قرار دیتے ہوئے فریقین کو عمران خان کےسابق سیکورٹی افسر کا نام پاسپورٹ کنٹرول لسٹ سے نکالنےکا حکم دیا۔
