اسلام آباد، اسلام آباد ہائیکورٹ نے بانی پی ٹی آئی و سابق وزیراعظم عمران خان کی بیٹوں سے بات کرانے اور جیل میں سہولتوں کیلئے درخواست پر سپرنٹنڈنٹ اڈیالہ جیل کو کل طلب کر لیا۔
بانی پی ٹی آئی عمران خان کی بیٹوں سے بات کرانے،ذ اتی معالج سے معائنہ اور جیل سہولیات کی درخواست پر سماعت چیف جسٹس اسلام آباد ہائی کورٹ عامر فاروق نے کی، عدالت کی جانب سے کیس میں سپرنٹنڈنٹ اڈیالہ جیل کو کل طلب کر لیاگیا۔
سماعت کےدوران درخواست گزار کے وکیل فیصل فرید اور جیل حکام عدالت میں پیش ہوئے۔
عدالت کی جانب سے استفسار کیا گیا کہ آخری سماعت میں جیل حکام سے فون کالز اور ملاقات کے حوالے سے رولز کا پوچھا تھا جس پر جیل حکام نے جواب دیا کہ فون کال 13 جنوری کو ہوئی تھی۔
چیف جسٹس نے پوچھا کہ ہر بار فون کال کے لیے درخواست تو نہیں دینا ہوگی؟ جس پر جیل حکام نے بتایا کہ واٹس ایپ کال رولز میں نہیں ہے لیکن عدالتی حکم پر کروائی گئی، سزا سنائے جانے کے بعد بشریٰ بی بی کی 2 بار ملاقات کرائی گئی، 17،20 اور 23 جنوری کو ٹرائل کے دوران بھی ملاقات ہوئی۔
چیف جسٹس کی جانب سے ریمارکس دیے گئے کہ دوران سماعت ملاقات نہیں ہے اسی لیے کہا تھا رپورٹ دیں، اگر ایسا ہی جواب دینا تھا تو میں سپرنٹنڈنٹ کو بلا لیتا ہوں۔
اسکے بعد عدالت نے تفصیلی جواب کے ساتھ سپرنٹنڈنٹ اڈیالہ جیل کو ذاتی حیثیت میں طلب کر لیا اور جیل حکام کو ہدایت دی کہ سپرنٹنڈنٹ جیل 23 جنوری کا عدالتی آرڈر پڑھ کر آئیں، ساتھ ہی عدالت نے سماعت کل تک کے لیے ملتوی کر دی۔
