اسلام آباد ہائی کورٹ نے اڈیالہ جیل کے سپرنٹنڈنٹ سے بانی پی ٹی آئی عمران خان سے ملاقات کرنے والوں کا مکمل ریکارڈ طلب کر لیا۔
ہائی کورٹ کے قائم مقام چیف جسٹس کی سربراہی میں لارجر بینچ نے عمران خان کی جیل میں ملاقاتوں سے متعلق درخواستوں کی سماعت کی۔ بینچ میں جسٹس ارباب محمد طاہر اور جسٹس محمد اعظم خان شامل تھے۔
سپرنٹنڈنٹ اڈیالہ جیل عبدالغفور انجم عدالت میں پیش ہوئے اور بتایا کہ عمران خان کی شیڈول سے ہٹ کر اور جیل مینوئل سے ہٹ کر بھی ملاقاتیں کرائی جا رہی ہیں۔
عدالت نے جیل سپرنٹنڈنٹ سے ملاقاتوں کا مکمل ریکارڈ طلب کرتے ہوئے سماعت 24 مارچ تک ملتوی کر دی اور ہدایت دی کہ بتایا جائے کہ عمران خان سے جیل میں ملاقاتوں کا طریقہ کار کیا ہے؟
دوسری جانب انسداد دہشت گردی عدالت نے 4 مقدمات میں پاکستان تحریک انصاف (پی ٹی آئی) کے سابق ترجمان رؤف حسن کی گرفتاری پر پابندی عائد کر دی۔
اے ٹی سی کے جج ابوالحسنات محمد ذوالقرنین نے 26 نومبر کے احتجاج سے متعلق درج مقدمات میں قبل از گرفتاری ضمانت کی درخواست پر سماعت کی، جس میں رؤف حسن اپنی وکیل عائشہ خالد کے ہمراہ عدالت میں پیش ہوئے۔
