رہنما مسلم لیگ( ن) سینیٹر طلال چوہدری نے کہا کہ پی ٹی آئی والےوفاقی دارلحکومت اسلام آباد میں احتجاج کا سوچ تو سکتے ہیں لیکن یہ احتجاج کی ہمت نہیں کریں گے۔
میڈیا نمائندو ں سے گفتگو کے دوران رہنما مسلم لیگ(ن) طلال چوہدری نے کہا کہ بانی پی ٹی آئی عمران خان تاریخ میں سب سے زیادہVIP قیدی ہیں، جیل میں ان کی ملاقاتیں ہو رہی ہیں، ملاقاتوں کے ساتھ انہیں سہولتیں بھی میسر ہیں، وی آئی پی قیدی کو وی آئی پی سہولتیںبھی میسر ہیں ۔
ن لیگی رہنما نے کہا کہ ایس سی او کانفرنس بڑی کانفرنس ہے، 200 وفود پاکستان آرہے ہیں، یہ کانفرنس کسی کی ذات کی نہیں، اس سے ملکی معیشت اور ملک کا مستقبل سے جڑا ہے۔
پی ٹی آئی والے ایس سی او کانفرنس کو بہانا بنا رہے ہیں، یہ بہانا بنا کر ایس سی او پر حملہ آور ہونا چاہتے ہیں، احتجاج کی کال اسٹیٹ کو بلیک میل کرنے کیلئے ہے، یہ احتجاج کا سوچ تو سکتے ہیں لیکن احتجاج کرنے کی ہمت نہیں رکھتے ۔
واضح رہے کہ شہر اقتدارمیں شنگھائی تعاون تنظیم کا اجلاس 15 اور 16 اکتوبر کو ہونے جا رہا ہے جس میں دنیا کے مختلف ممالک کے 200 وفود شرکت کریں گے۔
دوسری جانب وزیر اطلاعات سندھ شرجیل میمن نے کہا کہ سابق وزیراعظم عمران خان سیاست نہیں بلکہ صیہونی مفادات کے تحفظ کیلئےکام کر رہے ہیں۔
صوبائی وزیر شرجیل میمن نے اپنے بیان میں یہ کہا کہ سابق وزیراعظم کے اسرائیلی دارالحکومت تل ابیب سے روابط ملک دشمن قوتوں کی ایس سی او کو سبوتاژ کرنے کی کوششوں کا حصہ ہیں۔
شرجیل میمن کا کہنا تھا کہ تحریک انصاف اور اسرائیل کا گٹھ جوڑ قومی مفادات پر سمجھوتہ ہے، عمران خان چینی صدر کا دورہ سبوتاژ کرنے کی سازش کا حصہ رہے ہیں۔
