پشاور، صدر پی ٹی آئی خیبرپختونخوا جنید اکبر خان کا کہنا ہے کہ صوابی جلسے میں توقعات کے مطابق لوگ آئے، ہمیں نمبر گنوانے کی ضرورت نہیں۔
پشاور ہائیکورٹ میں میڈیا سے گفتگو کے دوران پی ٹی آئی رہنما جنید اکبر خان نے کہا کہ صوابی میں ہونے والے جلسے سے مطمئن ہیں، کسی کو نمبر گنوانے کی ضرورت نہیں، سوشل میڈیا کا دور ہے سب نے دیکھا کتنے لوگ تھے۔
جنید اکبر نے کہا کہ خیال تھا کسی نے فنڈز کی کمی کا کہا ہوگا، فنڈز کا رونا رونے والوں کو دکان کھولنی چاہیے، کسی کو گاڑیاں پہلے دی ہیں نہ آئندہ دیں گے، سزا و جزا کا اختیار میرے پاس نہیں، آئندہ کیلئے ایسے لوگوں کا راستہ روکوں گا جو محنت نہیں کرتے۔
دوسری جانب رہنما پی ٹی آئی و سینیٹر شبلی فرازکا کہنا ہے کہ انصاف دینے والے کمزور ہو جائیں تو ملک ترقی نہیں کرتا۔
پشاور میں نجی ٹی وی چینل سے خصوصی گفتگو کے دوران پی ٹی آئی رہنما شبلی فراز نے کہا کہ عدالتوں کا کام انصاف دینا ہے، انصاف دینے والے اداروں میں کمزوری آجائے تو لوگ خود کو غیر محفوظ سمجھتے ہیں، ایسی صورت حال میں ملک ترقی نہیں کرتا لوگ خوشحال نہیں ہوتے۔
