پشاور، مرکزی رہنما اور سابق وزیر مملکت پی ٹی آئی شہریار آفریدی پارٹی سے نکالے گئے رہنما شیر افضل مروت کی حمایت میں سامنے آگئے۔
پی ٹی آئی کے رکن قومی اسمبلی شہریار آفریدی کا میڈیا سے گفتگو کے دوران یہ کہنا تھا کہ 26 نومبر کو جو ہوا پوری قوم نے دیکھا، ہمارے لیڈر نے قانون کی بالادستی کی بات کی، ہم آئین و قانون کے لیے کھڑے رہیں گے۔
شہریار آفریدی نے کہا کہ پنجاب میں پی ٹی آئی کے کارکنوں پر ظلم کیا جا رہا ہے، جیلوں میں پی ٹی آئی کارکنوں پر تشدد کیا جا رہا ہے، فارم 47 والوں کی سیاست ختم ہو گئی ہے۔
شیر افضل مروت کو پارٹی سے نکالے جانے پر شہریار آفریدی نے کہا کہ شیر افضل کی پارٹی کیلئے خدمات ہیں، شیر افضل مروت کیلئے عمران خان سے بات کریں گے، کل میرے سامنے بانی پی ٹی آئی نے شیر افضل مروت کو ہٹانے کی کوئی بات نہیں کی۔
واضح رہے کہ گزشتہ روز میڈیا پر یہ خبر سامنے آئی تھی کہ پی ٹی آئی نے عمران خان کی ہدایت پر شیر افضل مروت کی بنیادی پارٹی رکنیت ختم کر دی ہے۔
شہریار آفریدی کا کہنا ہے کہ قانون کی بالادستی کیلئے ہم سب نے ایک ہونا ہے، جوڈیشل کمیشن کیوں نہیں بنایا جا رہا؟ کیا رکاوٹ ہے۔
دوسری جانب کرپشن اور کک بیکس ریفرنس میں احتساب عدالت لاہور کی جانب سے سابق وزیراعلیٰ پنجاب پرویز الٰہی کی مستقل حاضری معافی کی درخواست پر فیصلہ محفوظ کر لیا گیا۔
